LIMA ka samad dinunggaban ang naangkon sa biktima mga alas 7:30 sa gabii niadtong Septiyembre 20, sa District 1, Isla Delta, Consolacion, dakbayan sa Cagayan de Oro.
Mismong ang suspetsado pa si Rudy Alongay ang nidala ni Edward Gonzales, 42, ug residente sa nahisgutang dapit, ngadto sa tambalanan.
Sa nahipos nga impormasiyon, giingong nagpakitabang pa ang biktima ngadto sa silingan human nga naligo sa kaugalingong dugo ug nagtinga na.
Gidugang pa sa kapolisan nga nadiskobrehan sa ilang imbestigasiyon nga ang suspek mismo ang nagdala sa biktima sa tambalanan kinsa kauban ra usab niini sa paglingaw-lingaw ug pagtagay sa ilimnong makahubog.
Migawas ang taho nga daghan og nakabingkil ang biktima diin sutaon pa kini sa mga otoridad kung aduna kini kamatuoran.
Padayon pa ang kapolisan sa Police Station 5 (PS5) sa Macabalan aron masuta ang tinuod nga motibo sa pagpatay sa suspek.