GIHUPAY sa Department of Agriculture (DA)-Northern Mindanao ang kabalaka sa katawhan sa posibilidad nga mahutdan ang rehiyon og suplay sa mga utanon ilabi na nga nag-suplay na usab sa Luzon human naapetohan sa Bagyong Ompong.
Matud ni Chedy Ansale, chief, Agribusiness & Marketing Assistance Division sa DA-Northern Mindanao, nga abunda ang rehiyon og utanon dili lamang sa Bukidnon, Misamis Oriental apan lakip na sa Lanao nga bahin.
“So wala ta’y shortage in terms of vegetables production, daghan gyud di pa gyud mohubas, farmers are keep on producing,” tipik sa pahayag ni Ansale.
Gidugang pa niini nga nanghinobra ang produkto sa rehiyon hinungdan na usab nga dili angayang ikabalaka ang pagsuplay sa Visayas ug sa Luzon.
“Ang Bukidnon and Misamis Oriental farmers are producing surplus of vegetables, surplus in the sense that we don’t need any more our production in terms of per capita consumption,” dugang ni Ansale.
Kumpiyansa kini nga dili mahutdan ang rehiyon sa produkto sa mga utanon gani matag adlaw ang Mirayon gapagawas og 20 ka metric tons sa lima ka mga Barangay lakip nga mao’y nag-unang producer sa highland nga mga produkto sama sa karot, sayote,repolyo, patatas ug uban pa diin lakip usab ang Claveria ang adunay susama niini nga mga produkto.
Swerte usab ang Northern Mindanao nga aduna’y yuta nga susama niini gani naila na ang Mirayon lakip na ang Imtasula (Impasug-ong, Talakag,Sumilao, Lantapan). Nakapadala na sa unang shipment sa mga utanon ngadto na sa kaulohan.