Mga mag-uuma gilaumang mokita og milyones

NAGLAOM ang Department of Agriculture (DA) nga mokita og milyones ang mga mag-uuma ug ang uban nga mosalmot sa ipahigayong Aspires kon Agribusiness Support for Promotion and Investment in Regional Expositions sa SM Uptown ning siyudad sa Cagayan de Oro karong Septiyembre 28 hangtod 30, 2018.

Ang Aspires mao ang kahigayonan sa mga mag-uuma, mangingisda ug uban pa nga mokita og dako ug mas mapalambo pa ang ilang mga produkto pinaagi niining maong programa sa DA.

Anaa na sa lima ka tuig nga gipahigayon ang trade fair sa buhatan sa DA apan pinasahi kini karon gumikan na usab kay gawas sa mga produkto nga ipamaligya aduna’y mga training ug forum ang ipahigayon inubanan kini sa buhatan sa Department of Trade and Industry (DTI) ug Oro chambers.

“It’s only this time that there is training, investment forum so its improvement of the previous trade fair that we conducted,” pahayag ni Chedy Ansale, Chief, Agribusiness & Marketing Assistance Division.

Gila-oman nga mas mokita og dako ang mga mag-uuma niining panahona ilabi na nga ila nang namatikdan nga nagkataas ang kinitaan sa mga mag-uuma sa matag ipahigayong trade fair diin sa pagsugod sa 2014 mikita og P1,060,000, nahimong P1,400,000, P2 milyones ug niaging tuig namahimo kining P4 milyones.

“We notice that there’s an increasing income in terms of cash sales,last year we generated P4 million so it’s getting bigger,” dugang ni Ansale.

Gidugang pa nga kining programa alang sa mga mag-uuma diin ang DA ang maghatag sa libreng tranportasiyon sa ilang mga prudokto lakip na sa akomodasiyon ug pagkaon. Gilaoman ang mga prudokto sama sa bugas, utanon, prutas ug uban pa nga mapalit lamang nga barato ug presko.

Gibanabanang mosalmot ang mga 30 ka mga mag-uuma, nagkadaiyang grupo, asosasiyon, kooperatiba ug uban pa nga mga partisipante sa Rehiyon 10 gikan sa Bukidnon, Misamis Oriental, Lanao ug Misamis Occidental.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph