Lalaki wanted sa arson misukol, napatay

PATAY sa operasyon ang usa ka lalaki nga wanted sa kasong arson human giingong misukol sa kapolisan mga alas 6:30 sa gabii niadtong Huwebes, Septiyembre 20, 2018 sa Barangay Mandangwa, lungsod sa Balingasag, Misamis Oriental.

Ang kapolisan sa Provincial Intelligence Branch (PIB), Provincial Drug Enforcement Unit (PDEU) ug Balingasag Police Station nagpahigayon og operasyon aron isilbi ang warrant of arrest batok kang Michael Dahino nga giisyu ni Judge Jose Escobido sa Regional Trial Court-10 niadto lamang Septiyembre 17 tungod sa kasong arson.

Si Police Senior Superintendent Ronaldo Destura, provincial director sa Misamis Oriental Provincial Police Office, nibutyag sa SunStar SuperBalita nga si Dahino suspek sa pagpangsunog sa balay sa pamilyang Carillo niadtong bulan sa Marso ning tuig lamang sa Corrales Extension, dakbayan sa Cagayan de Oro nga miresulta sa kamatayon sa upat ka mga anak sa pamilya.

Nagsugod ang pagpangsunog tungod sa giingong buot niining suspek nga ma-solo ang halin sa yuta nga mobalor og P34 milyones. Ang pamilya Carillo ang giingong usa sa broker sa yuta ug higala sa modawat sa halin sa yuta.

Atol sa pagpangsunog, gituohan niining anaa sa maong panimalay ang tag-iya.

“Kung iyang sunogon ang balay, tanan nga makadawat ato nga amount mawala ug maiyaha ang kwarta,” pahayag ni Destura sa interbyu.

Gisunod-sunod nila ang mga lakaw sa suspetsado ug nasutang anaa na usab kini safe house diha sa Lapasan area.

Gawas niini, suspek kini ug iyang grupo sa mga hijacking ug pagpanulis sa nagkalain-laing lugar.

Daan na usab nilang monitor ang suspek nga armado ug gadala dala og ekplosibo.

Dihang gisilbi na ang warrant niini sa kapolisan niadtong daw sa walay pagduha-duha namusil kini sa makaduha ka higayon apan nabaslan sa kapolisan hinungdan sa iyang kamatayon.

Ang patay’ng lawas sa biktima gidala na sa duol nga punerarya sa dapit.

Sa pagsusi sa mga personahe sa Scene of Crimes Operatives (Soco) sa dapit, nakuha ang mga ebidensya sama sa 38 kalibre nga pistola niini ug usa ka hand grenade.

Gawas sa mga nakumpiska nakuhaan sab kini og 10 ka pakete sa gitouhang shabu ug laing duha ka pakete sa gitouhang marijuana.

Dugang ni Destura nga ang suspek pulos user ug pusher sa ginadili nga druga ug wala nay insakto nga address human nalambigit sa kasong pagpangsunog.

Sa ilang monitoring, gasige sab kini uli-uli sa Balingasag hinungdan gikasa nila ang operasyon dinhi sa lungsod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph