WALAY nakita ang mga personahe sa City Price Coordinating Council (CPCC) nga pagpango sa bugas atol sa ilang gihimong pagsusi sa Mindanao Container Terminal (MTC) sa Tagoloan port, Misamis Oriental.
Gibutyag ni Atty. Edgardo Uy, head sa CPCC, nga sila ang misusi aron nga sila usab mismo ang mobutyag sa katawhan nga walay hoarding nga nahitabo sa MTC.
"Na confirmed man gyud nato nga hawan na gyud, nakita nato karon nga duna nay addtional X-ray machine which could have, of course, contributed to the fast releasing or processing," matud ni Uy.
Apan gibutyag niini nga padayon pa gihapon ang imbestigasyon ilabi na sa mga warehouses sa siyudad kini human aduna na'y task force ang gihulma kauban ang Philippine National Police, Department of Trade and Industry, National Food Authority ug uban pa nga ahensiya nga maoy motan-aw niining maong isyu kalabot pagtago sa mga bugas.
"Moingon ta walay hoarding as of now. Karon sa atong nakita pero ang NBI lage should continue investigating, mao lage na dinhi wala ta'y makita pero didto sa mga bodega kinahanglan tan-awon gyud nato," dugang niini.