HAGONOY, Davao del Sur -- Nagkatibulaag sa pagpanagan ang mga sabongero human gironda sa kapulisan ang ilegal nga pasabong sa Gensville, Guihing, alas 2:10 sa hapon, Biyernes, Septyembre 21.
Ang operasyon gilusad sa mga sakop sa Provincial Mobile Force Battalion (PMFB) subay sa mando ni Davao del Sur Police Provincial director Senior Superintendent Ferlu Silvio.
Matud ni Silvio nga usa ka text message ang iyang nadawat batok sa reklamo sa pasugal.
Nag-iyahay pagpanagan ang mga anaa sa sabongan dihang miabot ang kapulisan mao nga way bisan usa nga nadakpan.
Apan, ang nagpailang lider sa purok nga si Jerry Cadampog, nagpakita og kopya sa "special permit" pinetsahan niadtong Septyembre 17, 2018 nga gilagdaan ni Municipal Administrator Marlon Brabat, ilawom sa otoridad ni Mayor Conrado Laza ug aduna say kauban nga resolusyon sa barangay nga naaprobahan niadtong Agosto 28, tuig kasamtangan.
Bisan pa man, gimandoan sa kapulisan si Cadampong nga undangon ang pasabong nga sumala pa alang kini sa pagsaulog sa ilang taliabot nga Araw ng Barangay. (Orlando B. Dinoy)