"Lisud man god kining mga prinsipyo sa langit."
NA, UNSAON ta man, mao man nay ingon sa atong Ginoong Jesus. "Kung dili kamo mahisama niining mga gagmay'ng bata, dili kamo makasulod sa gingharian sa langit" (Mateo 18: 3).
Lisud kaayo ning sitwasiyona, higala, kung mao ni gikinahanglan aron makasulod sa langitnong gingharian. Naningkamot man gani ta nga motubo ug matigulang, unya karon, ipabalik hinuon ta's pagkabata?
Sama lang pod ni sa giingon ni Ginoong Jesus ngadto ni Nicodemus- "Kung dili ka matawo pag-usab, dili ka makakita sa gingharian sa Diyos" (John 3: 3). Nakapangutana god intawon ang bantugang Pariseo: "Unsaon man pag-anak pag-usab sa usa ka tawo nga tigulang naman siya? Masuksok pa ba diay siya og balik sa tiyan sa iyang inahan?" (v. 4).
Ambot lang pod kung nabugo ba si Nicodemus og pinakalit o pinilosopo lang jud tong iyang pagkasulti. Kinsa may maghuna-huna nga mabalik ang usa ka tawo sa sabakan sa iyang inahan? O basin sinsero gyud nga ignorante si Nicodemus sa huna-huna ni Ginoong Jesus?
Hinuon, sa pagpaklaro sa Ginoo kaniya sa gipasabot sa pagpakatawo pag-usab pinaagi sa tubig ug espiritu, klaro gyud nga wala nakasabot si Nicodemus. Lisud man god kining mga prinsipyo sa langit. Ang nagapa-ubos sa iyang kaugalingon, ipatas-on. Ang nagapataas sa iyang kaugalingon, ipakaubos. Ang dato og mga yutan-ong kabtangan, maoy pobre sa langit. Ug ang pobre og mga yutan-ong kabtangan, maoy dato sa langit.
Sa giingon ni Ginoong Jesus nga kinahanglan nga mahimong bata aron malangit, naa hinuoy gipaklaro ang Ginoo sa Iyang gusto ipasabot. "Ang kinsang nagapaubos sa iyang kaugalingon sama sa gamay'ng bata siya maoy pinakadako sa gingharian sa Diyos" (Matt. 18: 4).
Ang pagkamapainubsanon diay mao ang langitnong kinaiya nga gusto makita sa Diyos sa Iyang mga katawhan. Kay kung ang tanang katawhan mapainubsanon, walay mahitabong gubot o lalis kay ang tanan magpaubos man. Walay usa nga mag-insister nga tama siya, ug walay magtamay sa iyang isigkatawo. Mao nay langit.
Ang pagkabata diay nga giingon sa atong Ginoo dili sa edad o buot, apan sa batasan o kinaiya. Daghan pong mga bata nga hambugero na pod bisa'g mga bata pa, kay gitudloan man og hinambog sa ilang mga ginikanan. Naa poy mga tigulang na nga dali lang kaayo masuko, mangluod o magminaldito.
Ang gusto nga makita sa Diyos kanato mao ang kinaiya sa mga tinuod nga mga bata sa ilang pinakamaayong pamatasan- dili masuko kung kasab-an, imong maymay ilang paminawan, mohilak tinuod kung bunalan, apan taud-taod, kadtong kasakit ilang malimtan.
Mga bata ra juy malangit. Ang tinuod nga mga bata- ang mapainubsanon, ang dili nagapangluod, ang dili maldito, ang kadtong mga maminaw kung maymayan ug andam sa pagtubo sa maayong mga kinaiya. Mao kini ang usa sa mga bidlisiw sa paglaum sa atong tumong nga magpuyo sa langit.