Binasi sa Kinaadman 2:12, 17-20; Salmo 54; Santiago 3:16 – 4:3; Marcos 9:30-37
ANG “power” kun gahum kuno mao ang abilidad sa pagpalihok o pagbag-o sa reyalidad. Pananglit ang pintor gamhanan kay pinaagi sa iyang paggama og larawan adunay motumaw gikan sa pintal ug tabla. Gahum ang pagmugna. Gamhanan pod ang usa ka tawo nga magmando ug adunay mosunod kaniya. O ang tawo nga maayong mangatarungan ug makadani sa uban ngadto sa iyang panghunahuna. O ang sapian nga makapalit sa buot niyang mapanag-iya. Daghang matang sa gahum. Kining tanan mao ang paggamit sa abilidad, kabtangan, o posisyon aron pagbag-o sa reyalidad. Gawasnong pagpili ang hagit kuno sa gahum kay kini gihatag lamang sa tawo ug dili sa kinaiyahan. Ang kinaiyahan dili man god gahum kondili pwersa. Wala kini hunahuna.
Bag-o pa gani gitagna ni Jesus ang iyang kamatayon, naglalisay na ang iyang mga tinun-an kon kinsa kanila ang labing dako. Nidamgo og gahum. Miingon si Jesus: “Kon adunay buot nga mahiuna, magpakahimong ulahi sa tanan ug alagad sa tanan.” Gitudloan sila sa insaktong paggamit sa gahum. Apan dili pa kini paigo. Gipatindog ni Jesus ang usa ka bata atubangan nila ug gikugos kini. Unya miingon siya: “Ang bisan kinsa nga modawat sa usa ka bata nga sama niini sa akong ngalan, modawat kanako, ug bisan kinsa nga modawat kanako, wala modawat kanako kondili Kaniya nga nagpadala kanako.”
Walay katungod ang mga bata sa panahon ni Jesus. Sayonsayonon lang ang pagpasagad kanila. Wala giila diha kanila ang atong gitawag karon og tawhanong katungod. Apan lahi si Jesus. Gidawat ug giampingan niya sila. Gihimo pa niyang larawan aron masabtan ang instaktong paggamit sa gahum. “Ang bisan kinsa nga modawat sa usa ka bata nga sama niini sa akong ngalan, modawat kanako, ug bisan kinsa nga modawat kanako, wala modawat kanako kondili Kaniya nga nagpadala kanako,” nagkanayon siya. Ang insaktong paggamit diay sa gahum mao ang pagdawat sa mga walay gahum kay diha kanila ang Ginoo.
Tinuoray nga gamhanan ang misalig sa Dios. Gani, sa libro sa Kinaadman, naglaraw ang mga daotang tawo sa pagsulay ug paglaglag kaniya kay babag sila sa ilang mga dautang tinguha. Sa pagpailob sa matuohon mosanag ang gahum sa Dios kay mingtuo kini nga “ang Dios maoy moatiman kaniya”.
Sa laing bahin, gipakita ni Santiago nga ang mga gamhanan sa kalibutan wala gyod diay gahum: “Ikaw nagtinguha apan wala magbaton. Ikaw nagpatay ug nasina apan wala ikaw makakuha...Wala ka manag-iya tungod kay wala ka mangayo. Nagapangayo ka apan wala makadawat, tungod kay sayop ang imong gipangayo, aron pagtagbaw sa imong mga kaulag.” Mabatunan ang mga gitinguha sa mahadlukon sa Dios tungod kay ang Ginoo maoy iyang kusog.
Gamhanan ba gayod kita?