TALIWALA sa pagpanghudlat sa bagyong Ompong, ang Sugbuanong mga atleta nakapakita gihapon og maayong performance aron agakon ang ilang tagsatagsa ka lugar sa pagpalambo sa ilang standings sa pagtiklop sa Batang Pinoy National Championships sa Baguio City.
Ang Cebu City Niños, sama sa naandan, mao gihapon nipatigbabaw sa mga delegasyon gikan sa Sugbo human kini nakahakot og 36 ka gold medals, 40 mga silver ug 44 ka mga bronze human minggawas ang opisyal nga resulta gikan sa Philippine Sports Commission (PSC).
Sa kinatibuk-an, ang Cebu City nagsunod sa overall champion nga mao ang host Baguio City nga nakatigom og 83-81-107 medal tally samtang naa sa ikatulo mao ang Quezon City nga adunay 34-13-31 tally.
Ang Cebu Province mingsaka gikan sa ikasiyam ngadto sa ikaunom dala ang 23-10-21 tally.
Ang labing dako og kalambuan sa delegasyon gikan sa Sugbo mao ang Mandaue City nga ning-ambak gikan sa ika-24 nga dapit ngadto sa ika-14 nga puwesto dala ang 12-14-17 tally.
Si Cebu City Sports Commission (CCSC) chairman Edward Hayco nga malipayon siya sa performance sa ‘grassroots volunteers’ taliwala sa mga kahasol nga nga naagian niini sa wala pa nagsugod ang kompetisyon tungod sa bagyong Ompong.
Ang kapin sa 300 ka mga delagado sa Cebu City natanggong sa Philippine Sports Arena sulod sa upat ka mga adlaw kay naghuwat kining mogawas ang bagyong Ompong sa Philippine Area of responsibility una mobiyahe paingon sa Baguio.
“After being cleared to travel to Baguio City, Mayor Tommy Osmeña and city councilors Joy Young and Eugenio Gabuya told the delegation to travel not just to play but to show sign of support to Baguio City,” matod ni Hayco sa Sun.Star Cebu. RSC, ESL