ADUNA pa’y pipila ka mga semana una magsugod ang 2018-19 season sa National Basketball Association (NBA) apan nalantawan nang daan ni Los Angeles Lakers president for basketball operations Magic Johnson kon unsa’y mahatod ni LeBron James sa ilang puwersa.
Human sa pipila nila ka mga semana nga pag-ensayo sukad nahiabot ang four-time MVP sa tugkaran sa Lakers, si Johnson naghinamhinam na kon unsa’y mahimo ni James aron mahubad ang iyang liderato ngadto sa kalampusan.
Sama ni Johnson, si general manager Rob Pelinka nagkanayon nga nagpanikad sab siyang mosaksi sa kampanya sa gipalig-on nilang puwersa sa umaabot nga season.
Hinayhinay nang nangandam ang Lakers bisan wala pa opisyal nga nagsugod ang ilang training camp ug parehong kuntento sila si Johnson ug Pelinka sa ilang mga nasaksihan.
“Just to see all of them together playing a pickup game, oh my goodness,” batbat ni Johnson.
“It’s something to watch. I’ve watched LeBron from afar. I’ve been at many of his games. But to watch him in the gym is a whole different thing. How much he makes everybody better, but also how he raises everybody’s level of play. His basketball IQ and his leadership ability, it’s all on display.”
Hinuon adunay haw-ang ang pagbansaybansay sa Lakers gumikan kay dili pa makaduwa ang ilang pambatong guard nga si Lonzo Ball gumikan kay padayon pa ang pagpaalim sa angol sa tuhod niini.
Gitugtan na man tuod sa iyang mga doktor si Ball nga makaduwa apan gipalabi sa Lakers nga hatagan pa kini og dugang panahon aron mahingpit ang pagkaalim sa angol sa tuhod niini nga gioperahan sa miaging duha ka mga buwan.
Sila si Johnson ug Pelinka parehong nakadayeg sa abilidad ni Ball isip pointguard apan alang kanila, daghan pa kini og angayang makat-unan.
Ang bag-o apan beterano nilang nakuhang magduduwa nga si Rajon Rando gilaumang makatabang og dako aron mahashasan pa ang abilidad ni Ball, kinsa mopatong pa sa iyang ikaduhang tuig sa NBA.
Determinado ang Lakers nga piyalan ang batan-ong si Ball og dakong obligasyon alang sa ilang kampanya.
Gawas nila ni James ug Rondo, ang Lakers ningkuha sab og dugang beteranong mga magduduwa nga sila si Lance Stephenson, JaVale McGee ug Michael Beasley sa tinguhang mahibalik ang ilang kanhi lig-ong puwersa.
Ang Lakers sulod na sab sa 16 ka mga tuig nga nahimong kampiyon apan gikan niadtong 2013, wala na kini nakasulod sa playoffs.
Nasayod ang Lakers nga nagkinahanglan pa’g dugang panahon ang ilang gipangkuhang beteranong mga magduduwa aron magkasuwetuhay sa usa’g usa apan alang kang Johnson, iyaha na kining nakita sa ilaha pa lang mga praktis.
“I mean, they are going hard,” pasabot ni Johnson. “It’s physical. It’s tough. There’s trash talking. It’s just a lot of fun, and also a lot of teaching at the same time. It’s really great to see these young guys getting a chance to learn from champions.”
Ubay-ubay sa mga sakop sa Lakers ang mga batan-on apan pulos adunay potensyal. AP, ESL