MISMO ang kalihim sa Department of Social Welfare and Development (DSWD) Virginia Ogoro nitunol sa burial assistance nga P25,000 ngadto sa mga pamilya nga namatyan sa pagdahili sa yuta sa Barangay Tinaan, dakbayan sa Naga.
Atol sa pagbisita ni Presidente Rodrigo Duterte sa evacuation area sa mga biktima sa pagdahili sa Naga, didto usab si Orogo inubanan ang regional director sa DSWD 7 Evelyn Macapobre aron motunol og hinabang.
“Makaka-asa po kayo nang patuloy na ayuda mula sa ahensiya hanggang sa kayo ay muling makabangon at makapag-simulang muli,” si Orogo nagkanayon.
Niadtong Biyernes, niabot sa 11 ka mga pamilya ang natunolan sa DSWD og P25,000 nga burial assistance.
Aduna’y lima ka mga evacuation center ang 500 ka mga pamilya nga biktima sa landslide diin nahimutang kini sa Naga Central Elementary School, Enan Chiong Activity Center (ECAC), Naalad Elementary School, Apo Cement Gym, ug Naga High School.
Nakatala na usab og 897 ka apektado nga pamilya ang DSWD o 2,836 ka indibidwal.
Sa pagkakaron niabot na sa P2 milyones ang relief support nga natunol sa DSWD 7 ngadto sa mga biktima sa kalamidad. HBL