PATAY ang usa ka 48 anyos nga lalakeng nagtindog sa kilid sa may dan A.S. Fortuna, sa Barangay Bakilid, dakbayan sa Mandaue, human pusila sa mga lalakeng nagmotorsiklo alas 8:56 kagahapon sa buntag.
Ang biktima giila pinaagi sa nakuhang passport niini nga si Ernesto Altejar, lumad nga taga Barangay Calindangan, Dumaguete City.
Base sa inisyal nga pakisusi sa kapulisan sa Subangdaku Police Station, sa nakita usab sa kuha sa CCTV footage sa Mandaue City command center, tulo ka mga lalakeng nagmotorsikl,o diin sa usa ka motor nakaangkas ang gunman nga nag-helmet og puwa, samtang ikatulong suspek nga nagsakay og laing motorsiklo, nagsilbing back-up sa gunman.
Nakita pa sa footage nga gikan sa pikas nga dan ang mga suspek ug ni- U-turn padung sa nahimutangan ni Altejar, pagtungod sa gunman sa gitindugan sa biktima, diretso kini nga namusil.
Ang biktima bisan kon samdan na, nakahimo pa sa pagdagan mga 300 metros ang gilay-on ug natumba sa duol sa gate sa usa ka establisemento.
Daling nisibat ang mga killer samtang gidala sa Mandaue City District Hospital, human ang pipila ka minutos namatay.
Gitug-an ni Police Chief Insp. Antonio Detuya, hepe sa Subangdaku Police station sa Superbalita Cebu, nga duha ka mga samad pinusilan sa iyang wala nga bukton ug usa sa wala nga kilid sa lawas. Na-recover usab sa kapulisan ang tulo ka mga kabhang sa bala sa crime scene.
Usa sa gitan-aw karon nga posibleng motibo sa kremin may kalambigitan sa ginadiling drugas, kini human masuta gikan sa Dumaguete Police Office nga anaa sa ilang drug watchlist si Altejar.
“As per info sa Dumaguete City Police Office, kay nakig-coordinaye man dayon ta nila, kay wa man sa iyang mga ID kon asa siya nagpuyo dinhi sa Mandaue City, according nila, anaa sa ilang watchlist si Altejar. So, ato gitan-aw posibleng nilayas ni didto sa ilaha, basin nakautang ni sa iya ra sab ka grupo ug gipangita gyud siya,” matod ni Detuya. FDD