DOSE ka tawo nga gituohang sakop sa usa ka dakong drug group sa Mindanao nadakpan sa buy bust operation sa mga sakop sa Talisay City Police Station inabagan sa Provincial Intelligence Branch sa Cebu Provincial Police Office alas 5:30 niadtong Biyernes sa hapon sa sitio Mananga, Barangay Tabunok, siyudad sa Talisay.
Nakuha gikan kanila ang 66.9 gramos nga gituohang shabu nga gibana-bana nga mobalor ang tanan sa P789,420.
Ang mga nasikop mao silang Casier Macaraya 62, taga Mananga, Tabunok; Allan Cansancio, 30, taga Lawaan 3; Chrisline Fajardo, 22, taga Lorega San Miguel, Cebu City; Venel Barro, 23, taga Bulacao, Talisay; Erlando Genodipanon, 30, taga Mananga; Tiny Campo, 29, taga San Isidro, Talisay City; Rolando Racaza, 49, taga Mananga, Tabunok; Dexter Carias, 37, taga San Isidro;, Leemarich Cañeda, 36, taga Poblacion, Talisay; Rey Bartolabac, taga Poblacion; Dennis Cabanilla, 39, taga Cantabaco, Toledo City ug Carlo Sabalones, 44, taga Ward 3, Minglanilla.
Matod ni Sr. Supt. Manuel Abrugena nga mokabat sa usa ka buwan ang pagpaniid sa Talisay police station labot sa drug den sa Mananga una nila gilusad ang buy bust operation.
Giingong usa sa mga nagpadagan sa drug den sa dapit ang nihulga sa usa sa mga police asset sa kapulisan nga maoy hinungdan nga mihimo dayon silag surveillance.
Matod niya nga miyembro sa usa ka dakong drug group ang mga nangadakpan nga naglihok sa habagatang bahin sa probinsya sa Sugbo, diin ang ilang supply gikan sa Mindanao.
Lakip sa ilang gitan-aw kon mga miyembro ba sa Parojinog drug group ang usa kanila sanglit nakadawat silag impormasyon nga naglihok usab sa Talisay ang dakong drug group sa Mindanao nga mao ang mga Parojinog.
Mga gamit sa paghingos sa shabu ug usa ka black widow Magnum revolver ang nakuha usab sa kapulisan gikan kang Leemrich Cañeda.
“Nag co-connect pa rin tayo pero base sa ating information, kumokuha sila ng supply sa Mindanao area. Tinitingnan natin kung kasama sila sa Parojinog drug group,” matod ni Abrugena.
Una nang niangkon ang labing dako nga drug lord sa probinsya sa Sugbo nga si Franz Sabalones nga didto siya magkuhaan og drugas sa mga Parojinog.
Gani napatay usab kaniadto sa Talisay ang tawo ni Parojinog human misukol sa gihimong buy bust operation.
Gawas sa kalambigitan sa ilegal nga drugas sa dose ka dinakpan, giingong modawat usab silag bayad aron dunay patyon kun mga gun-for-hire.
Nganong gigapos
Gigapos ang mga kamot og extension wire ug gipaluhod.
Mao kini ang nahitabo sa pipila ka mga dinakpan nga nasikop sa Talisay City police sa buy bust operation.
Matod sa hepe sa Talisay City nga si PSUPT Marlu Conag nga nahutdan sila og posas ingon man kuyaw ning uban nga manukol o makaikyas kay high sa drugas.
“Naubusan ng posas. Tapos mga dreaded hold-uppers ang iba dito, especially ang mga nakunan ng baril. Yung iba naman high sa druga, for safety purposes sa mga arresting natin,” si Conag nagkanayon.
Usa sa dinakpan niini nga si Casier Macaraya, 62, kinsa residente sa dapit ang ilado nga druglord sa Mananga 1.
Niabot sa 66.9 gramos ang nasakmit nga drugas diin nagkantidad kini og P789,420.