Gica nakahimog usurpation of authority?

GIAWHAG ni kanhi Dumanjug mayor Nelson Garcia ang Department of Interior and Local Government (DILG) nga himoan gilayon og tukmang lakang ang giingong usurpation of authority ni Mayor Guntrano Gica ug pag-abandonar sa katungdanan sa laing opisyal sa lungsod.

Sa iyang suwat ngadto kang DILG Regional Director Leocadio Trovela, si Garcia niingon nga kini gikinahanglan aron mapatuman ang mando sa Ombudsman nga nagtaktak kang Gica sa katungdanan.

Si Garcia nipasabot nga ang hukom sa Court of Appeals (CA) nga nagbaliktad sa hukom sa Ombudsman, di pa final ug mapatuman kay niduso pa siya og motion for reconsideration ngadto sa korte 10 ka adlaw human niya madawat ang kopya niadtong Agusto 14 2018.

Iyang gitumbok ang Section 4, Rule 52, Motion for Reconsideration sa Revised Rules of Court nga nag-ingon nga “pendency of a motion for reconsideration filed on time and by proper party shall stay the execution or final resolution.”

Busa, di pa makaasumer pagbalik sa katungdanan si Gica, pasabot ni Garcia.

Si Garcia nidugang nga gikinahanglan una nga huwaton ni Gica ang final nga hukom sa CA alang niini.

Ang Office of the Ombudsman sa miaging tuig, nitaktak ni Gica sa katungdanan human siya mapalging sad-an sa serious dishonesty ug grave misconduct tungod sa pagpalsipikar og liquidation report.

Ang giingong gi-tamper ni Gica mao ang resibo nga nagkantidad og P11,435 nga niburot ngadto sa P21,435 niadtong 2014.

Si Graft Investigator Portia Pacquiao nimando sa pagtaktak kang Gica sa serbisyo tungod sa serious dishonesty ug grave misconduct.

Si kanhi Ombudsman Conchita Carpio-Morales niaprobar niini.

Nimando ang Ombudsman sa pagkanselar sa civil service eligibility ni Gica ug nidili na kaniya sa subling pagpangalagad sa kagamhanan.

Human sa pagtaktak kang Gica sa miaging tuig, si Bise Mayor Rainero Asentista niasumer pagkamayor samtang pagka bise mayor si Konsehal Cesar Baricuatro, kinsa numero unong konsehal.

Nagsugod ang duha sa ilang bag-ong mga katungdanan niadtong Enero 4, 2018 human gipatuman sa DILG ang hukom sa Ombudsman.

Niduso si Gica og petition for review sa CA gamit ang Aguinaldo Condonation Doctrine ug gibaliktad sa korte ang hukom sa Ombudsman.

“Without waiting for the finality of the decision of the Court of Appeals and in total disregard of the decision of the Ombudsman dismissing him from office, as implemented by the office of the DILG, assumed the Office of the Mayor of the municipality of Dumanjug in clear usurpation of authority as penalized by Article 177 of the Revised Penal Code,” matod sa suwat ni Garcia.

Siya niingon nga ang pag-asumer ni Gica susama sa nahitabo sa Dakbayan sa Toledo, diin si Mayor John Henry Osmeña gisuspenso og usa ka tuig sa Ombudsman, apan gibaliktad kini sa CA.

Niasumer gilayon si Osmeña sa katungdanan walo ka buwan human sa pagsuspenso kaniya, apan gisultihan siya sa DILG nga kinahanglan iyang serbisyuhan ang nahabiling upat ka mga buwan sa silot.

Samtang, ang gibuhat usab ni Asentista maisip nga pag-abandonar sa iyang katungdanan human kini nibalik pagka biser mayor nga wa mohatag sa iyang letter of resignation, dugang ni Garcia.

Nipahibawo usab si Garcia nga iya nga gisuwatan ang Commission on Audit (COA) kay ang tanang mga dokumento nga gipirmahan ni Gica isip “official acts” pagkamayor nga naglambigit og financial transactions sa munisipyo maisip nga “illegal, null and void.”

Matod ni Garcia sa Superbalita Cebu nga kay di pa legal ang pag-asumer ni Gica sa katungdanan, wa siyay legal nga gahom sa pagpirma og bisan unsa nga financial transaction. REV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph