TUNGOD sa tumang kaluoy sa ilang gidangatan, nagbaha ang hinabang karon alang sa mga biktima sa pagdahili sa yuta sa bukirang dapit sa duha ka mga sityo sa Barangay Tina-an, dakbayan sa Naga, Sugbo niadtong Huwebes sa kaadlawon sa miaging semana.
Ang pagkamaluluy-on maoy nag-unang mithi sa mga Sugbuanon o sa mga Pinoy sa kinatibuk-an. Panahon sa katalagman sama sa nahitabo sa Naga, ang katawhan magkahiusa bisan ang higpit nga magkaatbang sa pulitika, sekta sa pagtuo ug nagkalainlaing organisasyon o bisan ang mga indibiduwal.
Walay mag-agmat kanila apan motunol sa bisan unsang hinabanang gikan sa kuwarta, pagkaon, tambal, senina, paghaad og pag-ampo ug uban pa sa paghupay sa pagbati sa mga biktima sa panahon.
Nailang isog ug dili magpalupig ang mga Bisaya nga kaliwat ni Lapu-Lapu, bugtong Pinoy nga nagmadaugon sa pagkig-away sa langyaw nga Espanyol, apan subra usab kalumoy og kasingkasing kon kinabuhi na sa iyang kaigsuonan ang hisgotan nga naapektohan.
Atong ipadayon ang pagtunol og hinabang sa mga biktima sa Naga apan maayo masusi nato ang ilang nag-unang panginahanglan. Makig-alayon sa ahensiya sa kagamhanan sama sa Department of Social Welfare and Development (DSWD) ug lokal nga kagamhanan alang sa hapsay ug koordinado nga pagbahin sa hinabang.
Ang pagboluntaryo maayo apan kinahanglang organisado. Mao kini ang punto ni Chiel Supt. Debold Sinas, direktor sa Police Regional Office (PRO) 7, sa paghashas nga mga tawo nga angayang tahasan sa risgo nga operasyon.
Sa pagkakaron, sulod na sa pipila ka adlaw, nipis na ang paglaum nga dunay buhi sa ilawom o milagro na lang gikan sa Kahit-as ang atong kasandigan.
Sto. Niño sa Sugbo, iiway kami sa dugang kasub-anan.