EDGAR J. SUMAGANG
Buagsong, Cordova, Cebu
DILI tiaw ang gibating kahibulong sa mga silingan sa magtiayong Crispulo-Pilar ning kalit nga pag-asenso sa ilang kahimtang. Usa lang ka ordinaryong mamumuo si Crispulo sa munisipyo sa ilang lungsod, nga nagdawat lamang og minimum nga suhol matag bulan. Apan naunsa ba nga nakapundar man og ‘T nga negusyo, usa ka negusyo nga nagkinahanglan og dakong puhonan. Ang magtiayon nakapausab dayon sa ilang balay nga nakig-indig na sa pinuy-anan sa usa ka kurakot nga opisyal sa gobyerno. May hugon-hugon pa nga sila mopalit og modernong sakyanan.
“Basin og gipiyalan si Crispulo sa usa ka sapiang kapitalista aron ipadagan ang maong neguysyo,” pangagpas ni Lario nga misugod pagtagay sa gi-order nilang medya galon nga tuba sa tubaan ni Nang Sanang.
Miyango-yango si Tobal. “Di ba mi-enter man sab na si Crispulo og pangahente og yuta? Tingalig nahalinan ug naka-komisyon og dako!” padayag ni Tobal dayong kalis sa buwa sa tuba nga miaslay sa baso nga gitagay ni Lario.
“Si Crispulo ug si Pilar na ba sab ang inyong gi-estoryahan?” sagbat ni Nang Sanang.
“Mao lagi, Nang. Sumsoman na man god dinhi sa ato ang kalit nilang pagka dato,” si Lario ang mitubag.
“Bitaw, Nang Sanang. Nasayod ka ba’g diin silag tinubdan sa ilang pagka dato?” misaling-it si Tobal.
“Dihay kausa nga may tuyo kini si Pilar nako,” matod sa dalagang guwang. “Mao tong nakalugar kog patapsing bahin sa ilang pagka dato. Igo ra mang miingon nga diskarte ra man kuno. Kon unsang matanga sa diskarte magpaabot lang ta kon kanus-a mahinog ang panahon. Wa may tinaguang dili mabutyag.”
Giyarok ni Lauro ang katapusang tagay aron makapauli alang sa paniudto.
Ang nagmingaw nga kaudtuhon sa Pangpang-Lain kalit lang nahipugwat sa mga buto-buto sa armas. Misunod gilayon ang kaalingugngog sa duha ka motor nga may mga angkas nga kusog kaayong mipadagan ug milabay sa tubaan ni Nang Sanang paingon sa haywey.
“Mora man og gikan sa bag-ong panimalay nilang Crispulo-Pilar ang mga buto, Bay. Basin gitulis ang magtiayon! Ato silang tabangan, Bay Tobal. Ikaw, Nang Sansng, mokuyog ka?” matod ni Lario.