NAGDALA og suwerte si Rey Suerte human niya napasulod ang iyang duha ka freethrows sa nahabiling 11 ka mga segundos nga mao ang nagpadaog sa defending champions University of the Visayas (UV) Green Lancers batok sa University of San Jose Recoletos (USJ-R) Jaguars, 84-83, sa main game niadtong Sabado sa Cebu Schools Athletic Foundation Inc. (CESAFI) college basketball sa Cebu Coliseum.
Nag-ung-ong na unta sa pultahan sa kadaugan ang Jaguars dihang nakapaulbo’g three-point bomb si John Ubalde sa nahabiling 12.7 segundos nga maoy naghatag kanila og 83-82 nga labaw.
Human niini, nakahagpat og foul si Suerte gikan sa inbound pass nga maoy naghatod kaniya sa 4.5-meter line alang sa iyang nakapadaog nga freethrows.
Sa return play, aduna pa unta’y igong kahigayunan ang Jaguars sa pagbalit-ad sa resulta apan pakyas sila pagmugna og puntos.
Ang kadaugan usa ka tam-is nga panimalos sa Green Lancers sa ilang nasinating dakong kapildihan gikan sa mga kamot sa Jaguars, 73-89, niadtong Agusto 26.
Ang Green Lancers, nga mingsaka sa 5-3 nga rekord, gipangulohan ni Suerte pinaagi sa iyang 30 puntos, nidugang og 14 puntos si import Bassieru Sackor samtang niamot og 13 puntos si Gileant Delator.
Ang Jaguars, nga nahagbong sa 5-2 nga rekord, gipangulohan sa kasamtangang MVP Jaybie Mantilla pinaagi sa iyang 23 puntos, nihatag og 19 puntos si Ubalde samtang nitampo og 16 puntos si RJ Dinolan.
Sa laing duwa sa college division, napahugtan sa University of Cebu (UC) Webmasters ang ilang paggunit sa solong liderato human nila gipangpukan ang University of San Carlos (USC) Warriors, 69-65.
Ang Webmasters mingsaka sa 7-0 nga rekord samtang ang Warriors nangahagbong sa 2-5 nga baraha.
Sa high school division, ang defending champions UV Baby Green Lancers ningmakmak sa Cebu Eastern College (CEC) Dragons, 75-51, samtang gipangbuntog sa Sacred Heart School-Ateneo de Cebu (SHS-AdC) Magis Eagles ang Southwestern University (SWU) Baby Cobras, 75-69.
Ang Baby Green Lancers ningkatkat sa 4-0 nga rekord samtang ningdakin-as sa Dragons sa 2-2 nga baraha.
Sa ilang bahin, ang Magis Eagles ning-abante sa 2-2 nga baraha samtang natagak sa 1-4 nga rekord ang Baby Cobras. (ESL)