NANUKAD na si Konsehal Doroteo Emit sa dakbayan sa Talisay alang sa iya unyang lakang sa pagdagan isip bise mayor sa sunod tuig nga piniliay atbang sa incumbent nga si Bise Mayor Alan Bucao.
Si Emit mipadayag iyang nalantaw kining kalambuan human sab siya gitaktak sa Partidong Alayon dihang nagkasungi sila sa kang Bucao ug sa mga sakop sa konseho nga iyang kaalyado kaniadto.
Nitataw ang konsehal nga dunay duha ngadto na sa tulo ka partido ang nangulitawo na kaniya alang sa iyang tinguha sa pagdagan nga ubos unya sa ticket sa laing partido.
Apan wala pa niya mahukmi kun asa siyang partido mosandig sa piniliay sa sunog tuig apan ang tataw niini nga bukas siya sa kandidatura sa pagka-bise mayor.
Si Emit namahayag nga nagpabilin siyang loyal ngadto sa ilang lider nga si Mayor Eduardo Gullas sanglit dako siyag utang nga kabubut-on niini nga maoy nagbutang kaniya sa konseho.
Pero gumikan sa pagsalikway na sa iyang mga kauban nga malakip siya sa partido buot niya nga tiwason ang ilang termino apan bukas siya sa ideya nga mag-bise mayor. (GPL)