GIPANGAYOAN og mga dokumento ug reports sa Commission on Audit (COA) ang lokal nga kagamhanan sa lungsod sa Minglanilla kabahin sa pagbisita sa kabarangayan niadtong 2016.
Sumala sa mga state auditor ang lungsod nigasto og P296,400 sa barangay visitation nga gi-charge sa buhatan sa mayor.
Apan giingong wa kini suportahi og mga dokumento nga nagpakita sa mga katuyoan sa proyekto ug actual accomplishments nga nasukwahi sa Circular No. 2012-001 sa COA nga pinetsahan og Hunyo 14, 2012.
Ubos sa mga probisyon sa maong circular, gikinahanglan nga masumitir ang mga resibo, certification nga gipirmahan og hingtungdang mga opisyal nga ang nagasto sa lungsod alang sa maong katuyoan ug ubang supporting nga mga dokumento.
Ang COA nipasidaan nga kon dili kini matuman, isuspenso o i-disallow ang disbursements sa audit ug kadtong nitugot sa paghimo sa mga bayad ang manubag.
Matod ni Minglanilla Municipal Administrator Concordio Mejias nakaduso na sila sa gipangita nga mga dokumento sa COA sama sa activity design ug post evaluation report kabahin sa barangay visitation sa 2016.
Sa 2017 audit report, sumala sa mga state auditor ang local chief executive sa lungsod kuyog ang mga opisyal sa munisipyo ug mga empleyado nagpahigayon og pagbisita sa 19 ka mga barangay gikan sa Oktubre 3, 2016 hangtod sa Nobiyembre 21, 2016.
Naglakip kini sa mga barangay Manduang, Tubod, Tunghaan, Pakigne, Calajoan, Tulay, Ward I, Tungkil, Linao, Tungkop, Camp 8, Camp 7, Ward III, Guindarohan, Vito, Cadulawan, Ward II, Cuanos ug Ward IV. (SCG)