Mga taxi gigamit sa paghatod og gidiling drugas

MAKIG-ALAYON si Mandaue City Police Office director Julian Entoma sa Land Transportation Franchising and Regulatory Board (LTFRB) 7 aron mapahimangnuan ang mga taxi operator ug taxi driver kalabot sa ilang nabantayan nga nahimo na nga pamaagi sa pag-deliver sa ilegal nga drugas pinaagi sa mga taxi.

Lakip na kini sa gisusi sa kapulisan nga nahimo na nga transportasyon sa paghatud-kuha sa mga drugas ang taxi, kini human nga pipila na ang nasikop atol sa checkpoint sa mga tawo nga luwan og taxi nga nasakpang adunay dalang drugs ug nga padung kini ipang-deliver.

Gani alas 11 sa Sabado sa gabii, upat sa 13 ka mga nasikop sa Centro police station sa dakbayan sa Mandaue City Police Office, nga gipanguluhan ni P/CInsp. Aldrin Villacampa atol sa gihimong checkpoint sa dan A. Soriano, Brgy. Centro ang luwan og taxi, diin nakuhaan kini og pinakete sa gidudahang shabu.

Giila kini nga sila Sonny John Manipolm, 26; Raymond Carona 19; Mark Steven Baunsit 18; Jonel Magbago 21; mga taga Brgy. Looc, dakbayan sa Mandaue.

Nakompiskar sa kapulisan ang 12 ka mga pinakete sa gituohang shabu.

Gihimo ang checkpoint alas 10 niadtong Sabado sa gabii.

Laing lima pa usab ka mga tawo ang nasikop sa nangaging mga checkpoint sa Centro Police Station nga nagsakay og taxi.

Duha niini ang nasikop niadtong Agusto 23 ning tuiga.

Giila ang mga nasikop nga sila Jeffrey Cardines ug John Bernaldez, parehong 20 anyos nga taga Brgy. Pasil ug Sawang Calero sa dakbayan sa Sugbo. Nakuhaan sila og 10 ka medium packs sa shabu.

Apan pasangil sa duha nga igo ra sila gipamalihug sa ilang higala nga ipahatud ang bag ngadto sa ilawom sa Marcelo Fernan Bridge sa habig sa Brgy. Pusok, dakbayan sa Lapu-lapu City ug nga gimanduan lang sila nga pasakyon sa usa ka taxi nga nagpaabot kanila aron maoy ilang sakyan.

Ang duha nasikop atol sa checkpoint, human makita sa kapulisan nga kadudahan ang mga lihuk.

Atol usab sa nahitabong pagpusil-patay sa duha ka mga giilang sakop sa security team ni Ozamis Vice Mayor Nova Princess Parojinog nga sila Mark Lester Castilllo ug Renan Mabida adunay taxi nga ilang gihunungan nga gidudahan sa kapulisan nga posibleng adunay transaksyon sa duha.

Matud ni Entoma nga posible ang maong taxi ang maghatud unta ngadto nila Castillo o magkuha gikan nila og ilegal nga drugas.

Kahinumduman nga ang duha kinsa giilang mga anaa sa drug watchlist sa Ozamis City ug giilang sakop sa Parojinog robbery and drug group ang gipamusil patay niadtong niaging Dominggo, Septiyembre 16, sa Brgy Cubacub, dakbayan sa Mandaue. (FMDD, Correspondent)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph