GRUPO sa mga negosyante ang nipundo sa kapulisan isip suporta sa anti-narcotics police personnel sa Police Regional Office (PRO) 7 nga nag-atubang karon og kaso sa korte.
Matod ni Supt. Reyman Tolentin, tigpamaba sa PRO 7 nga nidonar ang mga negosyante og P1 milyones alang sa 193 ka mga PRO 7 personnel nga nag-atubang og administrative ug criminal cases atol sa linya sa ilang trabaho ingon man sa drug busts operations.
Gamiton ang maong pundo isip bayad alang sa abogado, pag-draft sa affidavits, appearance fee ug ubang kinahanglanon nga bayrunon.
Gitunol na ni PRO 7 Director Chief Supt. Debold Sinas ang hinabang pinansiyal sa personnel kagahapon sa buntag.
Mapasalamaton usab ang maong opisyal sa maong donasyon ug nagkanayon nga dako kini og tabang nga magpabilin nga malinawon ang Central Visayas.
Lima ka mga kanhi operatiba sa Cebu City Police Office - Station 5 drug enforcement unit ang nakapahimulos na niini.
Nag-atubang kini og kaso sa Ombudsman sa giingong kalambigitan sa kamatayon sa 4 anyos nga si Skyles Abatayo niadtong Hulyo ning tuiga. (HBL,KAL)