SECTIONS
Saturday, October 20, 2018
SUPERBALITA CEBU

Biktima sa landslide nagmirida

MIYERKULES sa gabii, pipila ka oras sa wala pa mahitabo ang landslide sa Barangay Tina-an, siyudad sa Naga niadtong Septiyembre 20, ka lima ka higayon nanawag si Bianca Versales, 18, sa iyang amahan nga si Carlos Versales Sr.

Nahibung ang 50 anyos nga amahan nga nanarbaho sa dakbayan sa Sagay, Negros Occidental isip usa ka collector, kon nganong nagbalikbalik og tawag ang bugtong anak nga babaye.

“Himala ba kay ako man sige tawag niya kay kuripot na siya og load,” paambit sa amahan.

Sa mga tawag, pabation usab siya ni Bianca sa pagkanta sa iyang 2 anyos nga apo nga si Cayden, anak sa kamaguwangang anak nga si Carlos Jr.

Asoy sa amahan nga siya ang kanunay manawag ni Bianca aron mangumusta niini ug sa laing duha ka igsuon nga sila si Carlos Jr., ug Michael, ang kamanghuran.

Matod niya, suod nga managsuon si Bianca ug Michael diin ang babayeng anak ang nag-atiman sa manghod. Ang ilang inahan nga si Marilyn, domestic helper sa Kuwait.

Niadtong Huwebes sa hapon, sila si Bianca ug Michael nakaplagan sa mga rescuer nga naggakos nga natabunan sa nidahili nga yuta.

“Amping pirme, Pa. Ayaw sige inom, basin dili na ka kita namo mahuman og eskwela,” mensahe ni Bianca ngadto sa amahan sa usa sa ilang estoryahanay sa cellphone.

Si Bianca kay silver medalist ug usa sa mga pambato sa Naga sa taekwondo sa Central Visayas Regional Athletic Association (Cviraa) nga tinun-an sa kursong Bachelor of Secondary Education sa University of Cebu.

“Ang ako mapasaylo ko nila nga wala ko pirme makauli sa ilaha,” dugang sa amahan nga nanawagan og hustisya sa kamatayon sa mga anak ug nihangyo sa gobiyerno nga patubagon ang mga responsabli sa pagdahili sa yuta ug dagkong mga bato.

“Unta sa damgo lang ni nahitabo aron inig mata nako dili tinuod ang tanan sama ana,” padayag sa emosyonal nga amahan samtang nagtan-aw sa nagtapad nga lungon sa duha ka anak.

Sa ibabaw sa lungon ni Bianca, may gibutang nga panyo, sarong ug bag nga pulos violet nga maoy iyang paborito nga color samtang pulos puti nga sapatos ug t-shirt ang sa ibabaw sa lungon ni Michael.

Si Bianca, usa ka protective, mahunahunaon, mapinanggaon ug nagsilbi nga inahan ug amahan ni Michael, matod ni Rosemae Ann Sasan, 18, kinsa suod nga higala ug kanhi klasmeyt ni Bianca.

“Pinangga kaayo na niya si Michael. Sa eskwelahan, adtuon na niya unya hatdan og bawon. Iya nang gakson-gakson iyang manghod,” sugilon ni Rosemae sa Superbalita Cebu.

Ang hulagway nga nagpakita nga naggakos sila si Bianca ug Michael nga nalubong sa yuta dihang nabangalan sa mga rescuer ang bugtong saksi nga sa katapusang higayon, wa biyai sa maguwang ang iyang manghod ug gisuwayan nga maluwas ug mapanalipdan dihang nadahilian na og yuta ang ilang panimalay sa Sitio Sindulan, Barangay Tina-an, diin sila lang duha ang nagpuyo.

Nahibaw-an ni Carlos Sr. ang nadangatan sa mga anak dihang gitawgan sa iyang maguwang nga nagpahibawo nga apil ang duha sa mga nalubong sa landslide. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!