ANG Assumption College of Davao (ACD) Warriors ug Daniel R. Aguinaldo National High School (DRANHS) ang mga mihari sa nahuman nga Samahang Basketbol ng Pilipinas (SBP) 3x3 Under 16 Regional Finals kagahapon didto sa Alfresco Activity Center sa Felcris Centrale, Davao City.
Ang Warriors mipakita og impresibong kadaugan diin naselyuhan sa 12-10 batok Holy Child College of Davao (HCCD) Reds sa finals sa boy's division.
Niadtong 2017 dihang ang ACD gidulaan nila Alejandre Positos, Christian Paul Malano, Kent John Cabelis ug Carl Jeric Gudmalin, ang nag-kampyon diin misunod ang Davao Jones Academy (DJA) Spunky.
Sa ilang bag-o ug batan-on roster sa pagpangulo nila John Rey Pasaol, Kim Remollo, Francis Dagpin ug Clayton Avelino, ang Warriors mibalik sa unang puwesto ug mopresenta sa Davao Region sa umaabot nga National Finals 2018 sa Oktubre.
Samtang ang 2016 regional champion DRANHS, midomina sab og balik sa babaye human naka-eskapo sa dugay nga kalabang ACD sa 11-9 sa finals.
Ang DRANHS misalig sa serbiyso ni Aleah Kaye Clapano kinsang nangulo sa tim sa regional finals sa 2016.
Uban silang molupad sa ACD boys team sa all-expense paid trip padulong Manila nga sponsor niini ang SBP.
Ang maong duha ka tim nakadawat pareho nga tag P10,000 samtang ang runners-up miuli og P3,000 ug P2,000 sa maong han-ay.