“NISUNOD pa lang mo nako, ganiha ra unta nato nga nakuha ang akong amahan!”
Maisugong pamahayag ni Rolando Lapiz ngadto sa mga sakop sa search and rescue (SAR) team ubos pagpangulo ni Provincial Disaster Risk Reduction and Management Office (PDRRMO), Baltazar Tribunalo, pasado alas 4:00 kagahapon sa hapon.
Kini human nga wa nipadayon ang pipila ka sakop sa SAR team sa pagduol sa lugar diin posibleng natabunan ang amahan ni Rolando nga si Nicanor Lapiz, 85.
Ang team ni Tribunalo niadto sa mas taas nga bahin sa nadahilian sa yuta human usab nihangyo si Rolando kanila kagahapon sa udto.
Ang maong lugar nga gitudlo ni Rolando nga gitindugan sa balay diin nagpabilin ang iyang amahan duol na sa labing taas nga bahin sa bukid sa Tagaytay Uno, diin nagsugod ang pagdahili sa yuta, nga nilahos sa Sitio Sindulan.
Ang amahan wa gyud nibakwit bisan pa man gimanduan na sa kagamhanan sa dakbayan sa Naga nga mohiklin na pipila ka adlaw sa wa pa mahitabo ang landslide.
Gipasabot ni Tribunalo nga nihimo una sila og risk-assessment ug ilang nakita nga peligro pa kon mopahigayon sila og pagpangita ug posibleng pagpang-ugkat sa lugar, kay posibleng molihok pa ang yuta ug modahili.
“Lawom siya, unya ang character sa bato ug yuta nga imong latayan, anytime pwede siya mahulpa. Anytime mao siya pwede mahimong hinungdan nga mabutang sa risgo ang atong mga tawo nga nihimo sa search and rescue,” gipasabot ni Tribunalo.
Sa pagsusi sa grupo ni Tribunalo sa maong lugar human usab sila nilabang sa pikas bukid nga gitawag sa mga molupyo nga Tagaytay 2, didto ilang nakita nga ubay-ubay sa mga residente sa lugar nga nidahili ug mga silingang barangay ang makahigayon gihapon sa pagsaka ngadto sa tungatungang bahin sa nidahiling bukid agi sa gihulagway nga ‘shortcut’ nga dan.
Nipatawag si Tribunalo sa kapulisan sa Naga aron mopahimutang og mga pulis sa ubang agian sa mga residente.
“Nakasabot man ta sa emosyon niining mga nabiling pamilya, apan hangyo lang sad nato nila nga sunda lang sad mi, kay ilang kaluwasan ra sad ang among gihunahuna,” dugang ni Tribunalo.
Gawas kang Nicanor, laing tulo pa ang gibutyag sa ilang mga paryente nga posibleng nalubong nga buhi sa ibabaw nga bahin sa bukid sa Tagaytay, duha niini giila sa ilang paryente nga si Alfie Yapac, Benie Silana Jr. ug giingong uyab niini, human mahug ang motor nga ilang gisakyan atol sa pagdahili.
Lakip na sa nihiklin ang mga nanagpuyo nga anaa sa silingang bukid ang sitio Tagaytay 2, ug ubang pamilya nga anaa sa sunod nga barangay sa Tina-an, ang Barangay Inuboran.
Giduaw kagahapon ni Tribunalo ang lugar diin natabunan ang mga kawani sa Apo Cement. Sa unom, duha na kanila ang naugkat ug upat ang pabiling gipangita, ang tulo ka contractor ug usa ka watchman, ang watchman giila siya nga si Genaro Segovia, sumala sa paryente niini nga si Cresenciano Tapao.
Samtang, usa ka santos nga misa ang gipahigayon sa incident command post duol sa ground zero kagahapon alang sa mga nabiktima sa landslide ug alang usab sa rescuers.
Niadtong Sabado sa gabii usab, gihimo ni Cebu Auxiliary Bishop Dennis Villarojo ang santos nga misa alang sa mga namatay nga gihaya sa badminton court, duol sa City of Naga hall. Nipahasubo sila sa nabiling pamilya, apan nipahinumdom usab nga sa kamatayon aduna gihapoy paglaum.
Niawhag si Villarojo sa kaparian sa tanang parokya sa Cebu archdiocese nga iapil sa ilang mga santos nga misa ang mga biktima sa landslide sa Tina-an, ilabi na ang mga namatay, nabiling pamilya ug ang padayon pang gipangita.
Pabiling way klase karon ang 11 ka tunghaan sa Naga: Naga National High School, Naga Central Elementary School, Naalad National High School, Naalad Elementary School, CEPOC Central Elementary School, Tina-an National High School, Colon Elementary School, Tuyan Elementary School, Tuyan National High School, Mainit Elementary ug Mainit National High School. Kagahapon sa alas 4:00 sa hapon, 43 na ang patay, 10 ang samdan, ug 47 ang missing. (B)