TANANG mayor sa Pilipinas nangurog dihang nadunggan ang gibutyag ni Pangulong Rodrigo Duterte nga tanggalon sa puwesto kadtong mga mayor nga 'Missing in action' sa Bagyong Ompong.
Giingon sa Malakanyang nga kulang pa ang kasong negligence of duty batok sa mga mayor nga wa nagpakita o nagpakabana unsay sitwasyon sa ilang dapit nga giagian sa bagyo.
Kini ang gibutyag ni Presidential Spokesperson Harry Roque tunga-tunga sa gihimong aksyon sa Department of Interior and Local Government (DILG) nga panubagon gyod ang mayor ug uba pang local government officials sa Cagayan Valley nga nawala sa eksena sa bagyong Ompong.
Daw naglikay-likay ang mga opisyal sa maong dapit sa ilang obligasyon sa katawhan nga ibutang sa luwas ang ilang mga residente.
“Tama lang po na kung pupuwede sibakin na iyang mga hindi nagpakita sa panahon ng bagyo ‘no, dahil dapat panahon casus fortuito eh inaasahan natin iyong mga lokal na pamahalaan ang mangunguna sa kanilang mga constituents; hindi naman po puwede sila yung unang-unang nagtatago, sila iyong unang nagbakasyon. Kaya po sila hinalal ng taumbayan para mag-provide ng liderato sa panahon ng pangangailangan,” sumala ni Sec. Roque.
Human sa maong pahayag, gilayong naghimo og sekreto nga mga meeting ang halos tanang lokal nga kagamhanan sa nasud alang sa ilang mga unang aksyon ugaling maagian og bagyo ang ilang mga lugar.
Diha pa nanglihok ang mga opisyal nga napungot na ang pangulo sa nahitabo sa Cagayan Valley.
Sa maong hitabo, diri nakita ang tinud-anay nga paghatud sa serbisyo sa kasamtangan nga administrasyon ngadto sa katawhan.
Nagpakita lamang nga sa miaging mga administrasyon kini ang ginahimo sa mga lokal nga opisyal, maong daghang nakabsan og kinabuhi sa paghapak sa Bagyong Yolanda ug Bagyong Pablo.
Karon kay napukaw ang atensyon sa mga tapulan ug walay pulos nga mga opisyal, mag-amping na gyod hinuon ang tanan kay nakita na sa pangulo nga di lamang lugar sa Cagayan Valley ang dunay susama niini, kun di halos tanan nga lugar sa Pilipinas, gawas lamang sa Davao City.
Unta, nakat-on ug nangmata na ang mga tapulan ug walay pulos nga mga opisyal sa gobyerno sa maong hitabo.