14-anyos naghikog

MONKAYO, ComVal Province – Patay na dihang nabangalan ang 14-anyos nga tinun-an human naghikog didto sa Purok 2-B, Barangay Poblacion, alas 7:10 sa gabii, Biyernes, Septyembre 21.

Ang patay’ng lawas giila nga si Jereco (bansagon gitago), 14-anyos, Grade 7 student ug nagpuyo sa Diversion Road, sa maong barangay.

Base sa taho sa Compostela Valley Police Provincial Office nakadawat og tawag gikan sa nagpakabanang lungsoranon ang Monkayo Municipal Police Station kalabot sa patay’ng lawas nga nabangalan sa lugar.

Daling miresponde ang kapulisan ug naglusad og imbestigasyon sa dapit.

Miguwa sa imbestigasyon nga nagpakamatay ang batan-on pinaagi sa paghigot og pisi sa iyang liog luyo sa ilang panimalay.

Miresponde sab ang mga personahe sa Municipal Disaster Risk Reduction and Management Council ug gidala ang biktima sa Compostela Valley Provincial Hospital – Montevista apan gideklara nga dead on arrival sa doktor.

Sa interbyu sa SuperBalita, gibutyag ni Senior Police Officer 2 Lucio Camasura, imbestigador sa Monkayo MPS nga segun sa ilang pakighinabi sa pamilya sa biktima wala kini kalaban sanglit nailhan kini isip buotan nga estudyante.

Walay nakitang ilhanan ang mga imbestigador nga dunay foul play sa insidente. Gisusi na sa kapulisan ang motibo sa pagpakamatay sa biktima. Rockyben S. Catisay

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph