DIGOS CITY - Nagpahimagno ang City Disaster Risk Reduction and Management Council (CDRRMC) ngadto sa mga lokal nga turista nga ampingan ang Davao del Sur Shoal.
Mismong ang Sun.Star Superbalita ang nakasaksi nga daghan na ang nagaadto sa shoal nga nahimutang sa utlanang parte sa Barangay Dawis ug Davao Gulf Dominggo sa buntag, Septyembre 23.
Matod ni CDRRMC action officer Samuel Miralles, nga di sab magpataka og palawod sanglit dagko ang mga balod ug kusog ang hangin tungod sa hinungaw sa pasulod nga bagyong Paeng.
Gikinahanglan sab nga magsul-ob gyud og life vest aron maprotektahan ang kaugalingon sa takna sa emerhensiya.
Si Miralles nagbutyag nga di angayang hilabtan ang mga coral reef nga anaa sa lugar kay pinuy-anan kini sa mga gagmay'ng isda.
Gikan sa baybayon sa Dawis anaa sa 25-30 minutos ang byahe sa bangka aron maabot ang lugar diin gipalibutan sa lawom nga tubig dagat apan pag-abot sa shoal mahimo kang maligo sanglit taga hawak na lamang ang tubig dinhi.
Si Miralles midason nga di sab angayang labayan og basura ang lugar aron di mahilo ang mga isda.
Naglaraw ang lokal nga gobyerno nga butangan og floating cottages ang maong dapit aron mas molambo ang turismo. (Orlando B. Dinoy)