PATAY ang usa ka trabahante human giayo og sukmag niadtong nilabayng aldaw sa Brgy. 02 lungsod sa Talakag, Bukidnon.

Giila ang biktima nga mao si Marlon Yama, 34, ulitawo, sa susamang dapit ug trabahante sa Del Monte Philippines Inc.

Si Police Inspector Adulfo Mercado, hepe sa Talakag Police Station nibutyag sa Sun.Star Superbalita nga nahitabo ang insidente niadtong nilabayng adlaw mga alas 9:00 sa gabii.

Giatangan ang biktima sa suspetsado nga nailang si Josephus Noble, nagpuyo sa Poblacion, sa susamang lungsod ug trabahante sa Bukidnon Provincial Office.

Matud ni Mercado nga walay rason ug kalit lang ang gihimong pagpanukmag ni Noble ngadto kang Yama hinungdan nga nagtuo kining adunay personal nga panag-away.

Grabe ang naangkon niini sa kalawasan nga bun-og ug nagbuy-od kining nagkadugo agi'g sinukmagan dihang girespondehan sa kapolisan.

Unang gidala ang biktima sa Talakag District Hospital apan giduso saMadonna and Child Hospital ning siyudad sa Cagayan de Oro.

Niadtong Lunes mga alas 3:12 sa kadlawon nakabsan sa kinabuhi ang biktima sulod sa balay tambalanan.

Matud ni Mercado nga wala nasikop ang suspetsado tungod kay gipasakaan pa kini og kaso ning panahona ug usa na sikopon kung mapagawas na ang warrant of arrest niini.

Nigawas ang taho nga selos ang hinungdan sa gihimong pagpanukmag labina nga hubog ang suspetsado atol sa insidente.

Gani daghan ang niingon nga dili mosukol ang biktima niadtong tungora tungod sa pagrespeto niini sa suspetsado.