HUMAN nabaniog nga mobalhin na sa TV5 ang mga banggiitang ABS-CBN artists nga sila Dolphy ug Maricel Soriano, sa news department, may chika sab nga mobiya sa Kapamilya channel.

Chismis nga lakip sa molayas sa ABS-CBN sa tinguhang mahatagan og dakong chance sa TV5 mao si Cheryl Cosim.

Si Cheryl, nagpabilin sa ABS-CBN sud na sa 14 ka tuig.

Sumala sa mga sitsit, wala pa'y pormal nga kontratang gipirmahan si Cheryl sa TV5. Nigawas sab ang chismis nga di daw sab daw siya buhian sa ABS-CBN.

Apan ang naka-apan kay very tempting gayud daw ang offer sa TV5 kang Cheryl. Duha ka mga programa daw nga naghuwat kang Cheryl ug mas dako daw nga suweldo sa TV5 itandi kung magpabilin siya sa ABS-CBN.

Sugod March, giingong himuon nang primetime news anchor si Cheryl sa TV5 diin iyang makauban si Paolo Bediones.

Hatagan sab daw siya og solo public affairs program mao nga medyo naglibog gayud si Cheryl sa kasamtangan.

Nasayran nga si Cheryl ang nag-inusarang female news anchor nga gi-offeran sa TV5.

Sa kasamtangan, may "Salamat Doc" si Cheryl nga makita matag Sabado ug Dominggo sa ABS-CBN.. Siya sab ang anchor sa hourly news report daily gikan buntag hangtud gabii ug may current affairs program sab siya sa DZMM radyo.

May chika sab nga nangluod daw si Cheryl sa ABS-CBN tungod kay gibutang na sa primetime news program sila si Bernadette Sembrano ug Pinky Webb bisan mas una daw siya sa mga nahisgutan.