DUHA ka adlaw sa wala pa ang pagdahili sa yuta nga nahitabo sa Barangay Tina-an, dakbayan sa Naga, gipahibawo na ang local government unit (LGU) sa risgo nga nakitang liki ingon man ni-rekomendar ang Mines and Geosciences Bureau (MGB) 7 sa forced evacuation sa tanang residente duol sa dapit sa Sitio Tagaytay.
Septiyembre 18, Martes, base sa Geological Investigation o Assessment Follow-up sa MGB 7 kabahin sa liki sa yuta sa anapog nga nakita sa Apo Land and Quarry Corporation (ALQC) Tenement sa Sitio Tagaytay, nakita duol sa usa ka tower sa National Grid Power Corporation (NGCP) ang liki nga anaa na sa 19-19.5 centimeters samtang ang vertical displacement niini o ang paghulpa sa yuta niini niabot na sa 11-11.5 cm.
Nasayran usab nga ang pataas nga liki nga nakita duol sa 7 ka mga panimalay 80 metros sa kasadpan-habagatang kasadpan gikan sa maong tower sa NGCP, niabot na usab sa 16-17 cm ug anaay gilapdon nga 18-19 metros.
Unang nihimo og geological investigation ang MGB 7 kabahin sa liki nga nasigpatan duol sa tower sa NGCP niadtong Agusto 29 diin anaa pa lang sa 8-10 cm ang gilapdon niini, samtang anaa sa 1-3 cm ang gilapdon sa pataas nga liki duol sa 7 ka panimalay sa dapit.
Sa report sa MGB 7 bisan paman niadtong Agusto 29, usa kini ka joint investigation inubanan ang representante sa Barangay Tina-an, LGU sa Naga, ug sa ALQC.
"Immediate forced evacuation of all residents near the area as discussed with the representatives from ALQC and LGU-Naga during the exit conference," base sa nag-unang rekomendasyon sa mga geologists ngadto sa LGU Naga ug sa ALQC sa follow up assessment niini niadtong Septiyembre 18.
Nasayran usab nga wala makahatag ang ALQC sa kopya sa structural ug geotecnical maps ngadto sa MGB 7 alang sa mine quarry niini tungod sa kakuwang sa goelogists sa ilahang kompanya.
Ang maong geological investigation gihimo kini ni Jerali Rodrigo, ang senior geologist ug ni Dennis Gerald Aleta, supervising geologist nga parehong ubos sa Geosciences Division.