Ernesto D. Lariosa
San Fernando, Cebu
ANG katapusang aso nga iyang gibulhot misumbalik kalit misud sa iyang panumdoman. Hapit siya masud-ipi sa iyang nadungog sa iyang drayber nga nagtug-an sa pagbudhi sa iyang asawa nga si Mildred.
“Sir, nagbudhi ang imong asawa. Nia ang hulagway nga nakuha sa akong selpon.”
Wa siya makatuo sa iyang nakita. Si Mildred gyud nga nakig-sex sa usa ka bigutilyong lalake. Hapit moulbo ang kainit sa iyang ulo. Iya lang gipugngan nga di mobuto atubangan sa iyang drayber nga iyang gitahasan sa pagpaniid sa iyang asawa.
May gilaraw si Mauro. Kini agig panimawos sa asawa nga nagbudhi. Gipangga man unta niya kini ug gihatagan sa tanan. Makaabot siya sa tanang kapritso sa iyang asawa kay dako kaayo siyag suweldo isip kapitan sa usa ka oil tanker nga magbiyahian sa South China Sea gikan sa Uropa.
“I love you, Mau, ikaw ra gyud ug way lain!” Tam-is nga pasalig niini kaniya.
Apan kining ulag maoy hinungdan sa pagbudhi sa mga asawa nga di makapugong sa kauhaw sa unod samtang atua ang mga bana sa halayo magtrabaho.
“Bay, that’s biology, kon mang-lake ang imong asawa. Nia gud ta sa lawod, pasagdan lang na nato, sige bitaw tag pamabaye sa matag puwertong dunggoan.” Mipadayag ang primero niyang opisyal dihang nahibawo nga nagbudhi ang iyang asawa.
Apan lahi siya. Mao kini karon ang iyang gilaraw, Ang tig-a nga panimawos.Human sa usa ka semanang bakasyon. Nananghid siya sa iyang asawa kunohay nga mobalik na sa barko. Karon human na bubo-i niyag gasolina ang kilid sa ilang lawak. Seguro siya nga nakatug ang duha human sa kombati. Apan nagmigkaw siya sa iyang lihok nga di mahibaw-an. Gibutangan pa niyag duha ka granada ang pultahan aron di gyud makaipsot ang mga mabudhion.
Mikuha siyag sigarilyo sa iyang bulsa ug nagpalayog gamay sa linya sa gibutang nga gasolina nga misangko sa katapusang pultahan sa silong sa ilang balay. Iyang gidagkutan sa layter nga daw naglisod pagsiga. Nakadukot. Sa kapungot miyupyop siyag katulo. Gibugwak ang aso nga wa mapapas sa hangin kay misuot padulong sa lawak diin nagtagay na sab ang duha ka mabudhion sa makatagbaw nga alak sa gugma.
Milabay na ang tulo ka oras kay alas onse na sa kagabhion; di kapugngan nga mao kini karon ang iyang hunahuna ang kakutas sa duha nga nagbaktas karon sa bungtod sa himaya. Gitutokan niya sa makadiyot ang kalayo sa nag-aso nga sigarilyo. Naminti siya sa kapungot. Kalit gilabay niya kini sa gasolina nga ampayng mikaon sa kalayo dayon miulbo ang siga nga nagdagan padung sa itaas.
Daling milakaw si Mauro. Didto na siya sa unahan dihang mibuto-buto ug miulbo ang ilang balay. May singgit sa duha ka binuhat nga iyang nadungog. Mipahiyom dayon nanguros ang arsonist nga nakabawos. (Katapusan)