USA ko sa dakong supak sa laraw ni Sen. Tito Sotto nga ilisan ang katapusang linya sa Lupang Hinirang.
Dili lang tungod kay duna pa unta’y mas daghang importante nga dapat unahon no, sama sa inflation ug grabeng traffic.
Apan di sad gyud husto ning linyang nahunahunaan ni Sotto.
Ang gusto niya himuon ang katapusang linya sa Lupang Hinirang nga “Ang mamatay ng dahil sa'yo” ngadto sa “Ang ipaglaban kalayaan mo.”
Klaro man kaayong martyr ang awit. Kon imo ning ilisan mawa ang impact. Mausab ang iyang 'feel.’
Nahimo ang national anthem atol sa proklamasyon sa Independence sa Pilipinas human ta gisakup sa mga Kastila mao nga ingon ani ka-emosyonal ang iyang mga titik.
Kon imong tangtangon ang katapusang linya maguba ang kanta kay mao ni ang nagbugkos sa kinatibuk-an niyang lyrics. “Aming ligaya na 'pag may mang-aapi... ang mamatay nang dahil sa iyo.”
Kon ibutang sad ang “kalayaan” sa katapusan mahug na’ng redundant kay naa na may “paglayang minamahal” sa ikatulong stanza.
Bisan ang kompositor tingali nga si Julian Felipe nagkundinar sad karon ning pagkawa gyuy ayong balaora.
Intonation
Duna sa’y proposal ang musikerong si Joey Ayala nga ilisan ang katapusang linya sa Lupang Hinirang ngadto sa “Ang magmahal ng dahil sa'yo.”
Bisan si Tito Sotto wa sad kauyon kay ma-defeat kuno ang naunang linya.
Ang sakto di na lang gyud hilabtan bisan respeto na lang sa atong mga bayani nga ni-ula sa ilang dugo aron maangkon ang gimithing kagawasan nga atong gitagamtam karon.
Hinuon, ganahan ko sa version ni Joey Ayala sa Lupang Hinirang, diin iyang gitarong og litok ang pipila sa mga linya.
Sakto nga atong tarungon ang iyang intonation ug pronunciation. Apan nungkang ilisan.
“SOP sa TNT?”
Karon nga nibiya na si Regine Velasquez sa GMA-7, daghan ang mga nangutana kon asa diay siya paingon?
Siyempre, asa pa man diay nga tua na man tanan niyang barkada sa SOP sa ABS-CBN nga silang Janno, Jaya, Kyla, Jona, Jay-R ug hasta ang iyang banang si Ogie Alcasid.
Ang SOP mao ang kanhi Sunday variety show sa GMA nga kaatbang niadto sa ASAP.
Ayaw lang unya mo kahibong kon makakita na mo ni Regine nga usa na sa mga hurado sa Tawag ng Tanghalan (TNT).
Matinuod na gyud tong gisulti ni Vice Ganda nga, “SOP sa TNT.” Haha...