ANG Ateneo de Davao University (AdDU) Blue Knights nagpadayon sa pagdomina sa nagapadayong Future Star League nga dunay rekord, 5-0.
Nakuha sa Blue Knights ang ikalimang sagunsong daug human naka-eskapo sa San Pedro College (SPC) sa iskor, 26-19, sa Gold Star Gym sa Bo. Obrero niadtong Sabado, Septyembre 22.
Ang daug gisundan sa pagpalukapa sa Davao Christian High School, 40-33, niadtong Septyembre 16 sa Ladislawa covered court.
Una sa maong adlaw, ubos ni Coach Harry Hipolito wa nagpakita og kaluoy sa Philippine Nikkei Jin Kai International School (PNJKIS) nga gilubong sa iskor 63-3.
Dayon gisundan kini sa ilang pagbiktima sa Maa Central Elementary School (MCES) 40-12, human sa ilang pagdaug, 34-20 kontra Ford Academy of the Arts (FAA).
Sunod nila makalaban ang arch-rival Assumption College of Davao (ACD) Blue Warriors karong semana sa kompetisyon nga gisuportahan sa Mark Anthony Construction and Supply, ug Cherrylume. (ABM)