DEAR Noy Tikyo,
Tagoa lang ko sa ngan nga Amay, 31 anyos, may kapuyo ug duha ka mga anak.
Sa tinuod lang, wa ko nahigugma niining akong kapuyo. Napugos lang ko og ipon niya dihang mimabdos siya. Dili siya maoy akong gihigugma, kadtong lain nakong uyab. Apan nadala ko sa iyang hilak-hilak mao nga nag-ipon na lang mi.
Duna koy gikaila nga babaye taud-taod na. Nagkahimamat mi tungod kay hilig man ko mosulod og mga balay kalingawan.
Hangtud nga nagkasuod mi og maayo ug nagkauyab.
Apan minyo siya. Duna pod siyay duha ka mga anak. Mao ni ang akong gikalibugan karon kay nagkahigugmaay man mi. Ako na lang ba nga tumanan ning akong gibati ning bayhana ug buwagan ang akong kapuyo?
Amay
***
Amay,
Nganong imo pa mang himuong komplikado ang imong kinabuhi nga naa na man kay matawag nga pamilya karon? Ibutang nato nga wa ka mahigugma sa imong kapuyo kaniadto, apan nganong napun-an pa man ang imong anak og usa? Nagduda ko nga imo na lang ning rason karon aron depensahan ang imong pagpakabuang karon sa laing binuhat. Imposible nga kon wa kay gugma niya, nilanat pa hangtud karon ang inyong panag-ipon? Kon tinuod pang wala gayud kay gugma niya, hagbay ra unta nimo siyang gibuwagan kaniadto pa.
Angay nimong barugan ang imong pagka-amahan nianang imong mga anak ug pabilin sa imong kapuyo. Ayaw pagtinalawan.
Kon pananglit imong paundayonan kanang imong gibati karon nianang babaye nga imong kulokadidang, makatabang kaha kini sa imong sitwasiyon? Tingali og mosamot pa ang imong problema, ilabi na gayud kay duna sab siyay kabilinggan sa kinabuhi. Mora unya ka og usa ka tawo nga nagkuha og bato ug gipukpok sa iyang ulo.
Inay nga magtinalawan ka, atubanga ang imong responsabilidad sa imong mga anak ug kapuyo kay imo man nang desisyon nga nisulod ka nianang maong matang sa kinabuhi. Wa ka man pugsa.
Naglibog ka karon tungod kay wala ka may kapilian, gawas sa pagpabilin sa imong kapuyo ug pamilya. Busa aron nga mahimuyo ka uban nila, hunonga na kanang imong pagpangulididang kay di kini makaayo kanimo. Ihunong na sab kanang imong pagsulod og mga balay kahilayan.
Noy Tikyo