Editoryal: Di isyu ang panglawas

USA sa daghang mga isyu nga gibato ngadto kang Pangulong Rodrigo Duterte mao ang kahimsog sa iyang panglawas.

Mga kritiko ni Duterte kanunay lang manghagit kaniya nga ipakita ang iyang tinuod niyang kahimtang sa lawas.

Ang maayo’ng panglawas importante kaayo sa presidente gumikan sa dakong responsabilidad niini sa paglantaw sa kinatibuk-ang dagan panggobyerno sa nasud. Unsaon na lang pagpadumala sa presidente sa gobyerno kon kanunay lang niyang tagdon ang iyang lawas kay masakiton siya?

Giakusahan si Duterte nga nag-coma niadtong milabay nga mga bulan apan milutaw nga negatibo ang maong balita.

Apan niadtong bulan sa Agosto, giangkon ni Duterte nga nakasinati siya og “perpetual pain” sa lawas gumikan sa naangkon niya nga spinal injury sa dihang naaksidente sa pagdrayb og motor.

Maoy hinungdan nga gigamit kini sa mga kontra sa politika batok kaniya.

Ning bag-o sab, giangkon sa presidente nga mipailawom siya og endoscopy ug colonoscopy atol sa usa ka tigum sa Cebu.

Ang endoscopy maoy usa ka “nonsurgical” nga paagi nga gigamit aron eksaminon ang digestive tract sa tawo. Samtang ang colonoscopy mao ang pamaagi kon diin ang doktor mogamit og colonoscopy o scope aron nga lilion ang sulod sa rectum ug colon.

Ang colonoscopy maoy motan-aw sa nairata ug nanghubag nga tisyu, ulcer, polyps, ug kanser.

Apan karon pa lang mihatag na og katin-awan si Presidential Spokesperson Harry Roque bahin niini kay basin unya og gamiton na usab nga isyu batok sa presidente.

Matud ni Roque nga ang gihimo sa ehekutibo kabahin lang sa “routine” checkup niini ug di tungod kay duna siyay sakit.

Unta hunongon na sa mga kritiko ang pagpadako sa kahimtang sa lawas sa presidente.

Kay sa iyang gihimong pagbisita sa mga biktima sa landslide sa Naga ug sa Benguet ug sa mga naapektuhan sa bagyong Ompong, apil na ang mga sundalo nga samaran didto sa Cagayan de Oro ug uban pa, imposibleng dakong isyu ang panglawas ni Duterte.

Gawas pa, bisan pa og maingon natong himsog ang presidente, apan tungod sa iyang pangedaron karon, di na gyud sama sa batan-on ang iyang panglawas. Segurado kitang duna na sab siyay ginabati sa lawas, sama sa uban nga naa sa pagsawop na ang kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph