GILUGOS ug niluog nga gipatay ang usa ka 21-anyos nga dalaga sa dakbayan sa Kidapawan alas 7:40 sa gabii niadtong Sabado, Septyembre 22.
Giila ang biktima nga si alyas Rose, ug molupyo sa Barangay Lanao sa nahisgutang dakbayan.
Gibutyag ni Kidapawan City chief of police, Superintendent Ramel Hojilla nga nadiskubre sa iyang pamilya ang patay nga lawas sa dalaga nga naligo sa kaugalingong dugo sulod sa kuwarto niini sa ilang balay.
Nakaangkon ug daghang samad tinigbasan ang biktima, gihiwa pa ang ubang parte sa lawas niini ug gipaso gamit ang sigarilyo ug positibo nga gilugos.
Nasayran nga nag-inusara lang ang dalaga nga natulog sa ilang balay gumikan miadto ang iyang ginikanan sa Calinan, Davao City.
Nangayo dayon og tabang kang Office of the Presidential Adviser on the Peace Process Secretary Jesus Dureza ang mga paryente sa biktima ug gipaabot kang Philippine National Police Chief director, General Oscar Albayalde ang brutal nga kamatayon sa dalaga.
Gitahasan dayon ni Albayalde sila PNP-12 Regional Director Chief Superintendent Tam Rasco, North Cotabato Police Provincial Director Senior Superintenndent Maximo Layugan, Hojilla, ug Criminal Investigation and Detection Group 12 nga tutukan ang imbestigasyon sa paglugos ug pagpatay sa biktima.
Duha ka “person of interest” ang gidudahan sa mga awtoridad apan dili pa nila ikapagawas sa publiko gumikan nagpadayon pa ang ilang imbestigasyon. (Edgar E. Fuerzas)