Kapitan nagdala'g pusil sa airport, sikop

SIKOP ang usa ka kapitan sa barangay human kini nakuhaan og pusil sa iyang pagsulod sa checkpoint sa Francisco Bangoy International Airport, alas 7:50 sa gabii niadtong Dominggo, Septyembre 23.

Subay sa press release sa Police Regional Office (PRO)-Davao, ang dinakpan giila nga si Albert Espina, incumbent barangay captain sa Sto. Niño, Kidapawan City.

Sumala pa, expired na ang lisensya sa pusil sa dinakpan nga nakita dihang girekisa sa Davao International Airport Police Community Office (DIAPCO) ug Regional Public Safety Battalion (RPSB) ang sakyanan niini nga Nissan Navara.

Nakuha sa posisyon sa dinakpan ang usa ka falcon shooter caliber .45 pistol nga dunay serial number f11062524, tulo ka steel magazines, ug dunay mga buhing bala.

Gidala na sa Sasa Police Station ang dinakpan samtang ang pusil giintrigo sa Regional Crime Laboratory 11 Office alang sa Ballistic Forensic Examination.

Kasong pagsupak sa Republic Act 10591 kun Comprehensive Firearms Law ang ipasakang kaso sa dinakpan. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph