Pulis nalutsan na sab sa karnaper

NILAMPOS na usab ang mga karnaper sa pagbiktima og laing motorsiklo didto sa siyudad sa Digos.

Sa kasamtangan, ang maong suliran nagpabilin nga wa masulbad sa Digos City Police office.

Way nahimo ang tag-iya sa usa ka Honda XRM, kolor itom nga motorsiklo, nagbaton sa plakang IX-81841791 nga si Leonardo Jatico, molupyo sa Barangay Kauswagan, lungsod sa Matanao, Davao del Sur, gawas sa pagtaho sa kapulisan nga nahanaw na ang iyang motor.

Mga alas 9 sa kagabhion niadtong Lunes, samtang giparada sa biktima ang iyang motor didto sa dalang Crumb sa dakbayan, kalit lang kini nga gitangag sa mga wa mailhing suspek, hangtod karon wa na kini igkita.

Padayong nagmasulob-on ang biktima sanglit way ikatudlong suspek ang kapulisan.

Subay sa taho kini na ang ika-walong biktima sa karnap sukadd lang niadtong bulan sa Enero.

Apan way si bisan usa sa matod pa nagpaluyong sindikato nga nasikop ang otoridad.

Ang kapulisan sa dakbayan igo lang nipahibawo ngadto sa mga silingang istasyon nga nahanaw ang pipila ka mga motorsiklo apan padayon silang gihagit sa katawhan nga mohimo og lakang aron pakgangon ang maong krimen. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph