NAKUHA nako ang trabaho sa lalaki, nakuha nako nga babaye ko.” Mao kini ang linya ni Julieta Gempisao, 54, inahan sa pito ka mga anak, lola sa siyam ka mga apo ug usa ka proud kutsera sa Sitio Micabaja sa Barangay Duljo Fatima, dakbayan sa Sugbo.
Si Nanay Julieta ang nag-inusarang babaye sa gatusan kapin ka mga kutsero sa tartanilla nga naglaroy laroy sa kadalanan sa dakbayan sa Sugbo.
Magbyahe si Nanay Julieta matag alas 4 sa hapon ngadto sa alas 9 sa gabie, matag adlaw sa kadalanan sa Barangay Pasil hangtud sa Barangay Duljo Fatima sulod sa 20 ka tuig nga pagpamarada niini.
“Five hours ra man ang dagan ana, Sir, ug ang akong kabayo unya gikan sa alas 4 hangtud sa alas 9 sa gabie unya makakwarta ko og P700 sa usa ka adlaw,kuhaan sa abang nga P200, mao to naa koy 500 sa usa ka adlaw,” ni Nanay Julieta.
Ni-viral sa social media si Nanay Julieta samtang nagparada sa kadalanan. Matod niya gikuhaan siyag hulagway sa usa ka tinun-an ug didto na nagsugod nga nailhan siya sa mga tawo.
“Mao na gi picturan ko niya, giatangan ko. Didto na nagsugod nga nailhan ko sa Facebook,” asoy niya sa Superbalita Cebu. Kauban ni Nanay Julieta ang iyang partner sa pagpamarada ang iyang kabayo nga ginganlan niyag Avatar.
Iyang gitug-an nga naay mga makaila niya tungod sa maong post sa social media. “Kon mobiyahe ko, mosakay sila nako nya moingon; Ikaw gid to akong nakit-an?,” pasigarbo ni Nanay Julieta.
Nadak-an na ni Nanay Julieta ang pagpamarada ilabi na nagtrabaho ang ilang amahan isip kutsero sa dakbayan niadtong bata pa silang magsuon. Nakat-on na siya og pagpamarada pinaagi sa pag uban sa iyang amahan ug gani mamarada siya samtang nag-eskwela pa.
“Nanguryoso gyud ko nga mamarada, unya kamao man ko daan kay magkuyog kuyog kos akong papa sa una, eskwela ko, mamarada ko inig uli hangtud nakat-on ko,” asoy ni Nanay Julieta.
Niadtong Lunes, gibisita sa Superbalita Cebu si Nanay Julieta sa ilang balay sa Sitio Micabaja sa Barangay Duljo Fatima. Siya niasoy nga siya naningkamot isip inahan sa iyang pamilya. Usa sa naghatag og kusog kang Nanay Julieta mao ang iyang pamilya ug ang iyang bana nga na-paralyze tungod stroke dala sa high blood pressure. Iyang gibutyag sa Superbalita nga kaabag niya ang iyang bana sa pagpamarada, apan nahunong kini tungod kay nasakit.
“Pagkadaga nako murag medyo mauwaw ko, apan sukad pagminyo nako mamarada nako kay mauwaw sad ko sa obligasyon sa bana sa pagbuhi sa asawa maong kaming duha ang mamarada,” hinumdom pa niya sa ilang kinabuhing magtiayon kaniadto.
Matod niya, dakong tabang ang pagpamarada sa pagpamalit og mga gastuhon sa panimalay ug karon ilabi na sa tambal sa iyang bana ug balon sa iyang mga anak.
“Unsa may among panginabuhi kon di mi mamarada labi naron nga naparalyze na akong bana,” dugang ni Nanay Julieta Giklaro ni Nanay Julieta nganong wa siya mangita og laing panginabuhian kay sa pagpamarada siya nabuhi ug nakapaeskwela og mga anak. Si Tatay Adonis Fernandez, 57, igsuon ni Nanay Julieta nga usa usab ka kutsero, mitug-an nga anaa na sa ilang dugo ang pagpamarada.
“Akong lolo kutsero, ako papa kutsero sad, among dugo ang pagpangutsero.,” Tatay Adonis Matod usab sa pag umangkon ni Nanay Julieta nga si Oliver Bernija, 23, nga walo ka tuig na nga kutsero, lahi man sa panan-aw sa katawhan si Nanay Julieta, legal kini nga nagtrabaho.
“Lain man sa panan-aw sa uban apan bout hunahunaon mao naman ni ang panginabuhian, legal man sad ni wala gyud angay ikuan,” matod ni Bernija Alang kang Nanay Juliet, mupadayon siya sa pagpamarada hangtud sa wala na syay kusog sa pagdala sa tartanilla ug paghatud sa mga pasahero sa ilang destinasyon.
“Kada adlaw jud ko namarada, kada adlaw basta mayng lawas ako ug akong kabayo,” nanay Julieta.