GIPAUBSAN sa Court of Appeals (CA) ang desisyon sa Office of the Ombudsman Visayas ngadto sa simple misconduct gikan sa grave misconduct may labot sa kanhi pagka-konbikto sa kanhi opisyal sa barangay Guadalupe.
Si kanhi kagawad Ruben Baculi, executive assistant ni kanhi Mayor Michael Rama niadtong tuig 2015 gitaktak sa Ombudsman may labot sa maong kaso diin gipatuman ni Rama may labot sa giingong sayop nga paggamit ni Baculi ug laing unom ka kanhi barangay official sa Guadalupe sa P6.5 milyones nga porf barrel fund ni kanhi Kongresista Antonio Cuenco nga gipaagi sa Department of Agriculture.
Sa hukom ni Associate Justice Edward Contreras sa CA 19th Division, gipagaanan niini ang hukom sa Ombudsman batok sa kanhi OIC barangay chairman sa labing dako nga barangay sa siyudad.
"The petition is granted. The decision and order of the Ombudsman Visayas dated May 27,2014 and October 20,2014 respectively in OMB-V-A-12-0170-C are modified to the effect Ruben T. Baculi is adjudged guilty only of simple misconduct meted the penalty of three months suspension without pay,” tipik sa hukom ni Contreras.
Ang CA nag-ingon nga sobra ra ang hukom sa Ombudsman sanglit igo lang nilingkod si Baculi isip acting barangay captain kay siya ang number one councilor sa niadtong tuig 2006 ug dili sab siya miyembro sa Bids and Awards Committee diin igo ra siyang nagpirma sa dokumento nga pirmado sa BAC members.
Ang Guadalupe nipalit og P6.2 milyones nga balor sa seedlings nga gilangkuban sa lanzones, mango, durian, ug rambutan ug P245,000 nga pipes ug garden hose niadtong tuig 2006 ug 2007 nga walay competitive bidding nga para himuong livelihood project sa barangay.
Ang kampo ni Baculi pinangulohan ni Atty. Rey Gealon ug kaubanan sa EC Labella and Partners Law Office niduso sa ilang petition for review didto sa CA- Cebu City.
“The three magistrates concluded that there was no corruption committed rather it was a merely simple misconduct in the procurement which was never really the intention of my client in the first place,” padayag ni Gealon.
Kay wala na sa serbisyo si Baculi, ang maong suspension iyang pagabayran balor sa sweldo nga iyang gidawat dihang siya gisentensiyahan sa Ombudsman balor og tulo ka buwan. PAC