DI mominos 151 ka lalakeng mga kawani sa Carcar City Hall ang gipaubos sa kinalit nga random drug testing kagahapon sa buntag.
Matod ni Candice Acuña, information officer sa kagamhanan sa siyudad sa Carcar, nga agi og pagsaulog sa Civil Service Month, gihimo ang drug testing diin giseguro ang mga lalake nga mga kawani kay maoy kasagaran nga magpositibo sa paggamit og gidili nga drugas.
Usa ka pribadong health service provider ang nihimo sa drug test ug karong adlawa, mahibaw-an ang resulta.
Nangu sa pagpa-drug test si Mayor Nicepuro Apura uban ni City Engineer Santiago Calinawan Jr. ug officer-in-charge City Agriculture Office Rey Trangia.
“To give good example nga niapil gani ang mayor ug department heads, how much more ang uban, nga dili sila maggahi-gahi (pagpa-drug test),” sigon ni Acuña sa Superbalita Cebu sa pagpaubos sa drug testing ni Apura.
Apil sa gi-drug test ang mga lalakeng personnel sa motorpool sa siyudad, traffic enforcers, mga tiglimpyo sa siyudad ubos sa City Environment and Natural Resources Office (Cenro), rescuers sa City Disaster Risk Reduction and Management Office (CDRRMO), ug mga drayber sa ambulansiya, heavy equipment, ug mga bus.
Ang maong mga empleyado gimandoan nga moadto sa NICE Social Hall human sa flag ceremony ug didto gihimo ang kinalit nga drug testing ug ang resulta, mahibaw-an karong adlawa.
Wa hinuon empleyado ang nisibat sa drug test.
Sumala ni Acuña nipasidaan nang daan si Apura nga taktakon sa serbisyo ang mga empleyado nga magpositibo sa paggamit og gidili nga drug test atol sa confirmatory test.
Sa miaging tuig, upat ka mga job order nga mga empleyado sa Carcar City Hall ang natangtang sa trabaho human nagpositibo sa drug test ug mamatud-i nga tiggamitan og gidili nga drugas.
Moabot sa kapin 500 ang mga empleyado sa Carcar City Hall sa pagka karon, dugang ni Acuña. SCG