GILUBONG na kagahapon sa hapon ang 20 ka mga biktima nga nangamatay sa pagdahili sa yuta sa Sitio Sindulan, Barangay Tina-an, siyudad sa Naga niadtong, Huwebes sa kaadlawon, Septiyembre 20.
Atol sa lubong, gipalanog sa mga pamilya sa nangamatay ang pagpangayo og hustisya ug ang panawagan nga ipahunong na operasyon sa quarry sa Apo Land and Quarry Corporation.
Gikan sa hayaanan hangtod sa paglubong ang ubang mga miyembro sa pamilya ug mga kabanay kay nagtabon sa ilang ilong tungod sa kabaho gikan sa lawas sa nangamatay nga gisud sa mga lungon.
Si Hermogenes Alinganga, 60, hilom nga nagsud-ong sa lungon sa iyang anak nga si Jenissa, sa umagad nga lalake nga si Lemuel ug ilang upat ka mga anak dihang padung na ilubong.
Di siya makatuo nga wala na ang iyang anak nga babaye.
“Dili gyud ko kadawat. Dili pa nila panahon. Sila unta ang mulubong nako, dili ako kanila,” padayag ni Alinganga sa SunStar Cebu kagahapon.
Niabot na sa 54 ang naugkat nga mga patayng lawas sukad niadtong Septiyembre 20 human nidahili ang yuta sa mga sityo Sindulan ug Tagaytay sa Barangay Tina-an, ug 39 ang padayong gipangita sa lainlaing rescue groups. (SCG)