Lariosa: Kasuko sa Kinaiyahan

MAKABAWOS man gani ang bugha, kinaiyahan pa kaha? Apan naangin ang mga inosente sa Sitio Sindulan, Tinaan, Naga City nga gilubong buhi sa landslide sa miaging semana.

Duha ang gitutokang sad-an sa trahedya sa Sindulan diin sa pagsuwat ning lindog, 33 ang mga patay nga nakawtan. Kapin sa 100 ang wa pa makita. Pipila ra ang nangaluwas.

Ang gitutokan mao ang sayop nga assessment (hiling-tan-aw) sa Mines and GeoSciences Bureau (MGB) nga ang liki sa bukid sa Tagaytay way kaso kay natural lang sa yuta.

Nga sa liki kuno way labot ang pagkubkob (quarrying). Angayng hibaw-an nga ang kanunayng pagkubkob makatandog ug makahuyang sa yuta.

Gitan-aw sad kining patakag kubkob sa Apo Land Quarrying Corporation (ALQC) sa dapit nga maoy hinungdan sa dahili sa yuta (landslide) nga milubong sa Sindulan.

Husto ang diha-diha nga pagsuspenso ni Gob. Hilario Davide sa tanang quarrying operations sa Sugbo. Ibalik lang ni sa rekomendasyon sa DENR, matod pa.

Gitangtang sa ilang katungdanan ang upat ka mga dagkong opisyal sa MGB sa sayop nga assessment. Sila unta ang mopasidaan sa kapiligro niini kon nagtarong pa.

May hinungdan ang ilang pagpabor sa ALQC? Angay sad ning imbestigahon kon wa bay padangog. Okey kaayo ang pag-ulbo sa kaspa ni Naga Mayor Kristine Chiong.

Kinahanglan nga kini sila taralon sad sa hukmanan aron adunay mapalgang hustisya ang kaliwat sa nangamatay. Aron mabilanggo kon kinsa ang nakasala.

Ang angay sad nga bantayan karon mao ang kabukiran sa lungsod sa San Fernando nga naputos sa quarrying operations tungod kay 2 ang planta sa semento.

Tiaw mo na, 2 gyud ang planta sa semento nga naa sa Poblacion. Ang mga residente hingos lang tawon sa dautanabog morag gidaog-daog sa mga kapitalista.

Magmatngon niini ang DENR ug ang lokal nga kagamhanan aron kalikayan ang nahitabo sa Sindulan. Kapanaminan kini sa mga lider sa San Fernando.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph