MAAYONG matutokan gyud ang kahimtang sa panglawas sa mga namakwit sa evacuaiton centers sa dakbayan sa Naga human sa pagdahili sa yuta sa Barangay Tina-an sa naasoy nga dakbayan sa miaging semana. Nabiktima na sila sa katalagman, mabiktima na usab sa pagpabaya sa kahugaw sa tinubdan sa tubig sa evacuation centers?
Si Dr. Eugenia Mercedes Cañal, pangulo sa medical task force sa Department of Health (DOH) 7 nga nagsusi sa kahimtang sa mga bakwit sa dakbayan sa Naga, nikompirmar ngadto sa mga tigbalita nga dul-an sa 19 ka water sources sa lima ka mga dapit ang nasuta nga kontaminado sa E. Coli o fecal coliform, kagaw gikan sa hugaw sa tawo.
Ang nakakurat, tulo ka ‘mineral water dispensers’ sa Enan Chiong Activity Center (ECAC) ug usa ka refilling station nasuta nga positibo sa samang kagaw. Sa naasoy nga evacuation center, dunay 516 ka mga pamilya o 1,411 ka indibiduwal nga temporaryong nagpuyo sa dapit.
Dili lang makauuwaw kini sa lokal nga kagamhanan apan, dugang pag-antos nga gipahamtang sa mga bakwit. Hinuon, segurado nga giatiman na kini karon nga problema apan nagkinahanglan sa dugang pagpahinumdom sa tanan nga kinahanglan nga mamintinar ang kalimpiyo sa palibot.
Dugang pa, ang grabeng nag-usab-usab nga temperatura sa panahon, kainit apan kalit lang mouwan, nagdala kini daan og mga sakit nga komon sa tingtugnaw sama sa trangkaso, sip-on, hilanat, labad sa ulo ug uban pa. Mas komplekado kini kon ubos ang immune system tungod sa stress sa nahitabo ug dili balanse nga pagkaon.
Kon kinsay gisangonan sa kagamhanan sa Naga nga naghatag og tubig, labi na sa water refilling station, kinahanglan manubag sa balaud human dili tiaw ang epekto ngadto sa gatosan ka mga biktima ug dungog mismo sa dakbayan.