NAGPADAYON ang kampaniya sa Road and Traffic Administration batok sa motorela nga overloading dinhi sa atong siyudad.
Samtang miangal ang Solidarity of Transport Alliance in Northern Mindanao Pagkakaisa ng Samahan ng Tsuper at Opereytor Nationwide kon Starex-Piston.
Tinguha sa RTA nga luwas ang drayber ug mga pasahero sa ilang biyahi hinungdan nga gidili kining pagbutang og pasahero atubangan kon kilid sa drayber.
Ang Starex-Piston gusto unang ilangay o undangan ang pagpangdakop samtang giduso pa nila ilang hangyo ngadto kang Mayor Oscar Moreno.
Dugay na kining problema sa overloading sa motorela ug dugay sab mihimo og lakang ang City Hall aron maundang kini.
Naanad na ang mga drayber ug ang mga pasahero sa maong sistema. Bisan maghuot walay reklamo kay ang tinguha nila mahatod lang sa ilang destinasyon.
Kon duna may statistic sa aksidenti diin nalambigit ang motorela gumikan sa salikwaot nga pagmaniho gumikan sa pasahero sa kilid sa drayber, kana tingali maihap lang sa tudlo.
Ang RTA ug ang hugpong sa mga motorela dunay ilang kaugalingong mga katarungan nganong dili o angay butangan og pasahero sa kilid sa drayber.
Kumusta man ang mga pasahero. Napangutana ba nato kon komportabli ba sila nga maghuot sa sakyanan?
Nagtuo ta nga si Rafael Floirendo Sr., sa iyang pag-imbento niining motorela niadtong 1964, wa siya manglantaw nga mosobra sa unom ka mga pasahero ang maong sakyanan.
Ang priyoridad sa mga imbentor mao, una sa tanan, ang safety sa pasahero ug ang komportabli niini, ug labaw sa tanan makatabang kini sa katilingban.
Dihang gi-introduce ang motorela ni Floirendo sa publiko nabaniog ang Cagayan de Oro sa tibuok Pilipinas tungod niining alternatibo nga sakyanan diin mohakot og daghang pasahero sa labing minus og gasto.
Kon nuntan nato kining sistema karon pag-overloading sa gamay nga sakyanan, ug paglimit sa paglihok sa mga pasahero ug pag-ipit sa drayer, basin baya mabaniog na pud ang atong siyudad kon dunay, simbako lang, mahitabo nga mga aksidenti tungod kay pakyas ang gobiyerno sa pagkorehir sa maong problema.
Hinaut nga dili molugak ang RTA sa ilang kampaniya, kana, kon naglantaw sila sa kaayohan sa pasahero ug drayber.
Ang labing dali nga solusiyon niini mao ang pagkuha nianang side-seat sa drayer. Possible ha?