MIHANGYO ang kapitan sa Barangay Lapasan nga sa dili pa ibalhin ang mga apektadong residente sa proyekto sa dakbayan ug sa Department of Public Work and Highways (DPWH) nga unta kumportable ang puy-an sa mga apektado nga residente sa ilang temporary shelter.
Matud ni Barangay Kapitan Julito Ogsimer nga kung mahimo tan-awon una ang maong lugar kauban ang council sa dili pa e-relokar ang anaa sa 65 ka mga apektadong residente.
“Akong hangyo, before i-adto ang katawhan sa temporary shelter, akong tan-awon uban ang council kung kumportable ba ang katawhan ayha i-relocate,” pahayag ni Ogsimer.
Gidugang pa usab niini nga dili kini supak sa maong lakang gumikan kay ang maong proyekto alang man usab kini sa tanan ilabi na sa mga residente ug lumulupyo sa maong dapit.
“Ako lang gyud ipasabot sa ila, lisod man sab kaayo atong tagaan og kahasol ang implementasiyon nga proyekto nga kani man gud nga proyekto proteksiyon pud ni sa kadaghanan ug mga constituent sa Lapasan,” dugang ni Ogsimer.
Giingong kasagaran sa mga apektado mao ang nanimuyo sa creek side sa nahisgutang dapit.
Samtang gipasalig usab ni Yam Lam Lim, ABC President nga ilang suta-on ang mga residente ilabi na usab ang mga pamilya nga wala’y mga papeles aron nga matabangan ug mahatagan og ayuda sa siyudad nga dili mabayaran sa buhatan sa Department of Public Works and Highways.
Nasayran nga anaa na sa ikatulong adlaw sa public hearing sa nagkada-iyang barangay ang gipahigayon sa mga Hapsay Buhay Program ug sa siyudad sa Cagayan de Oro.