GITUSAK-TUSAK sa bala ang lawas sa usa ka lalaki samtang sakay sa iyang sakyanan niadtong Septiyembre 23, alas 5:20 sa hapon sa Landfill, Zayas, Macanhan, Carmen, dakbayan sa Cagayan de Oro.
Patay si Franklin Vios, taga Caffas, Macanhan, Carmen kinsa giingong tigtaod og tari sa manok sa bulangan.
Sa nahipos nga impormasiyon gikan sa kapolisan, gikabutyag nga pauli na ang biktima sakay sa iyang Hyundai Starex Van paingon sa esteng bahin apan kalit kining gipusil sa wala mailang suspetsado nga naka motorsiklo.
Mga 100 metros ang gilay-on nakita na sa nagmaneho sa Mitsubishi pick-up ug Honda nga motorsiklo nga nag-zigzag ug wala na sa linya ang maong van hinungdan nga nabanggan niini ang walang bahin sa pick-up truck ug napunggitan pa ang motorsiklo dayong lahos sa punoan sa gemilina.
Matud sa mga nakasaksi, gipusil sa maka-upat nga higayon ang biktima sa kilirang bahin sa bintana sa iyang sakyanan.
Dali pa nga gidala sa J.R Borja General Hospital si Vios apan nakabsan kini sa kinabuhi human naka angkon og samad sa dughan, walang bahin sa kamot ug sa iyang tiyan.
Sa pagsulat niini nga balita, kasamtangang anaa sa St. Peter Memorial Homes ang patay’ng lawas sa biktima samtang padayon pa ang kapolisan sa imbestigasiyon aron sa dinaliang pag-ila sa wala mailang mga suspetado.