MAPASIGARBUHON si Misamis Oriental Governor Yevgeny Vincente Emano human milambo ang turismo ubos sa iyang administrasyon.
Iyang gihulagway nga usa sa nakapalambo niini ang pagkahiusa sa mga tourism officer sa matag lungsod taliwala sa kolor sa politika.
Sa pagkakaron, anaa na sa implementation stage ang uban mga tourist destination sa matag lungsod sa probinsya ug pag-improve sa ilang tagsa-tagsa ka mga atraksyon ug andam na usab ang ilang pundo.
Dugang ni Emano nga gawas sa pagpalambo sa turismo, gisuwayan ug giapilan na usab nila ang tanang klase sa beauty pageant sa nasod ug niining uwahi suportado sa ilang pamunoan si Ms. Danna Rose Socauco kinsa nagdala og garbo sa probinsya human nalakip sa Miss Millenial 2018 sa Eat Bulaga sa GMA 7.
Mapasalamaton usab si Bambi nga sa hinay-hinay naila na ang Misamis Oriental dili lamang sa mga patsada nga atraksyon apan lakip na ang mga delikasiya nga gama mismo sa Misamis Oriental.
Kanunay sab nga gihangyo niini sa katawhan labina mga Misamisnon nga motabang sa pag promote sa turismo sa lalawigan tungod kay dako kini og tabang sa panginabuhian sa katawhan sa probinsya.
Dugang ni Bambi nga dungan sa pagpalambo sa turismo hatagan sab og oras niini ang infrastructure project sama sa pagtarong sa dalan paingon sa mga atraksyon, kooperasyon sa kalungsoran, tabang sa katawhan sa social media.
Kauban ang kapolisan ug kasundalohan nga mapadayon ang kahapsay ug kalingaw sa lalawigan sa Misamis Oriental. (SVB)