PATAY ang usa ka empleyado sa gasolinahan human giingong napatay sa iyang amo niadtong Septiyembre 21, alas 5:30 sa hapon sa Purok 3, Barangay Punong, dakbayan sa Gingoog, Misamis Oriental.
Giila ang biktima nga si Teotimo Derecho, residente sa susamang dapit samtang gitumbok nga suspetsado ang tag-iya sa gasolinahan nga si Cim Guzmana.
Sa inisyal nga imbestigasyon sa Gingoog Police Station sa pagpangulo ni Station Commander Police Senior Ariel Phillip Pontillas, nasuta nga ang biktima ug suspek nag-inom niadtong tungora kuyog usab sa laing kauban nga giilang si Leonito sulod sa panimalay sa suspek.
Apan saysay ni Leonito sa kapolisan nga nigawas lamang siya aron mangihi ug nakurat na lamang dihang nadungog ang sunod-sunod ug kusog nga buto.
Dugang niini nga wala na siya moadto pa sa sulod sa kahadlok sab sa iyang seguridad.
Daling miresponde sa crime scene ang kapolisan pinagulogan ni Senior Police Officer 3 Robinson Neri uban ang mga personahe sa Scene of Crimes Operatives.
Naabtan sa crime scene nga nagbuy-od ug naligo sa iyang dugo ang biktima.
Samtang wala pay 24 oras nadakpan ra usab ang suspetsado.
Nahipos sa crime scene ang basyo sa bala sa 9mm pistol.
Usa sa gituohang motibo sa pagpamusil ang giingong panaglalis sa duha tungod sa halin sa gasoline.
Kasamtangang nagtingkagol sa prisohan ang suspetsado.