NAHUPAY ang kabalaka sa Samahang Basketbol ng Pilipinas (SBP) dihang naseguro niini nga naa ra sa luwas nga kahimtang si naturalized player Andray Blatche human kini nalambigit sa aksidente sa sakyanan sa miaging adlaw.
Si SBP president Al Panlilio nakahigayon sa pagpakigsulti sa kampo ni Blatche ug iyang nasuta nga dili ra grabe ang nahiaguman sa kanhi magduduwa sa National Basketball Association (NBA).
“Upon checking with Andray’s agent, Ms Chao Espaldon, it was confirmed that it was just a fender-bender and Andray is perfectly fine,” pamahayag ni Panlilio nga napatik sa Spin.ph.
Si Blatche nag-post og video sa iyang Instagram account diin makita ang duha ka mga sakyanan nga nagbangga.
Makita nga naa sa sulod sa usa sa mga sakyanan si Blatche diin aduna siya’y kauban hinungdan nga daghan ang nabalaka lakip na si Panlilio.
“I was alarmed when the accident involving Andray made the rounds in social media. At first, it looked like a major head-on collision,” pasabot ni Panlilio.
Si Blatche mahimo nang makaduwa og balik sa Team Pilipinas sa FIBA World Cup Asian qualifiers karong Disyembre 3 diin mo-host sa Pilipinas batok sa Iran.
Ning higayuna, maserbisyuhan na ni Blatche ang iyang tulo ka mga duwa nga suspensyon sa FIBA tungod sa iyang pagkahilambigit sa karambola tali sa Gilas Pilipinas ug Australia Boomers. ESL